Қай өңір етті көбірек тұтынады?

       2025 жылдың III тоқсанына арналған азық-түлік өнімдерін тұтыну жөніндегі деректер белгілі болды. Мәліметтер халықтың тұрмыс деңгейі бойынша 11,7 мың үй шаруашылығын қамтыған іріктемелі зерттеу нәтижесінде алынды.

       Ұлттық стстистика бюросының мәліметінше, үй шаруашылықтарының азық-түлік тұтыну шығыстарындағы ең жоғары үлес ет және ет өнімдеріне, сондай-ақ нан мен жарма өнімдеріне тиесілі – сәйкесінше 18,3% және 7,6%.

Ет пен ет өнімдерін тұтынудың ең жоғары деңгейі Алматы қаласында, сондай-ақ, Жетісу, Қарағанды және Ақмола облыстарында байқалды. Бұл өңірлерде бір адамға шаққандағы орташа тұтыну көлемі тоқсанына шамамен 24 кг. Ал ең төмен көрсеткіш Шымкент қаласында тіркеліп, бір адамға шаққанда тоқсанына 16,1 кг болды, – делінген бюро мәліметінде.

       Өңірлер бөлінісінде жекелеген азық-түлік түрлерін тұтыну деңгейі де әртүрлі. Нан өнімдері мен жарма бұйымдарын ең көп тұтынатын өңір – Түркістан облысы, мұнда бір адамға тоқсанына 43,4 кг келеді. Балық өнімдерін ең көп тұтыну Солтүстік Қазақстан облысында байқалып, көрсеткіш 5,8 кг құрады. Сүт және сүт өнімдерін тұтыну көлемі Ақмола облысында жоғары – бір адамға тоқсанына 83,1 кг. Ал көкөністер мен жемістерді ең көп тұтынатын өңір – Алматы қаласы, тиісінше 30,76 кг және 36,9 кг.

       Жалпы алғанда, 2025 жылдың III тоқсанында жан басына шаққандағы азық-түлік өнімдерін орташа тұтыну көлемі келесідей:
картоп – 11,3 кг
нан өнімдері мен жарма бұйымдары – 31,7 кг
ет және ет өнімдері – 21,2 кг
жемістер – 29,6 кг
қант, тосап, шоколад және кондитерлік өнімдер – 11,4 кг
сүт өнімдері – 60,5 кг
жұмыртқа – 53,9 дана
балық пен теңіз өнімдері – 3,6 кг

https://baq.kz/