Қазақстан май өнімдері экспортын 1 млрд долларға дейін жеткізуді жоспарлап отыр

Министрлік майлы дақылдар егіс алқаптарын ғылыми негізделген түрде 5 млн гектарға дейін ұлғайтуды көздеп отыр

Қазақстан күнбағыс майын экспорттау бойынша әлемнің үздік ондығына кірді, деп хабарлады ауыл шаруашылығы министрлігі.

Ведомство хабарлауынша, соңғы жылдары майлы дақылдар егіс алаңы екі есе артып, 3,9 млн гектарға жетті, өңдеу көлемі 12%-ға өсіп, 700 мың тоннадан асты, экспорт 29%-ға артып, 582 мың тоннаны құрады.

"Өңдеуге инвестицияларды субсидиялау, айналым қаражатына қолжетімділікті қамтамасыз ету саланың тұрақтылығын сақтап, одан әрі кеңеюіне мүмкіндік берді. Қолдау шараларының арқасында Қазақстан күнбағыс майын экспорттау бойынша әлемнің үздік ондығына кірді, Еуропалық Одақ елдеріне күнбағыс шротының жеткізілімі бойынша 3-ші орында. Біз Орталық Азия өңірін күнбағыс шротымен және күнжарамен толық қамтып отырмыз", — деді ауыл шаруашылығы вице-министрі Ермек Кенжеханұлы.

Министрлік майлы дақылдар егіс алқаптарын ғылыми негізделген түрде 5 млн гектарға дейін ұлғайтуды көздеп отыр. Бұл күнбағыс майын экспорттау бойынша әлемдік жетекші үш елдің қатарына кіруге мүмкіндік береді.

Ведомство хабарлауынша, Халықаралық сауда орталығы (ITC), Майлы дақылдар өңдеушілердің ұлттық қауымдастығы және "QazTrade" АҚ-ның қатысуымен Жол картасы әзірленді.

"Құжат саланың экспорттық әлеуетін 1 млрд долларға дейін арттыруға, өткізу нарықтарын кеңейтуге және қосылған құны жоғары өнімнің терең өңделуін ынталандыруға бағытталған", - дейді министрліктегілер.

Дерек көзі: https://sputnik.kz