Футболдан 2024 жылғы Еуропа чемпионатында бүгін, 11 шілдеде 1/2 финалдағы екінші ойында Англия мен Нидерланд құрамалары кездесті, деп жазды kaz.inform.kz.

Кездесу екі құраманың толассыз шабуылымен басталды. Десе де алғашқы минуттарда екеуі де қателікке бой алдырған жоқ.

Ойынның 7-минутында нидерландтық Хави Симонстің алыстан тепкен добын ағылшын қақпашысы Джордан Пикфорд қайтара алмады.

Өз қақпасына гол жіберіп алғаннан кейін Англия құрамасы таразы басын теңестіруге ұмтылды. Нидерланд құрамасының қақпасы маңында жиі бой көрсетті. Осындай сәттердің бірінде нидерландтық қорғаушылар өз айып алаңында Англия шабуылшысы Гарри Кейнге қарсы тәртіп бұзды.

Бейнеқайталауды қарап шыққан германиялық Феликс Цвайер Нидерланд қақпасына пенальти белгіледі. Бұл мүмкіндікті Гарри Кейн мүлт жіберген жоқ.

Ал 91-минутта Англия сапынан Олли Уоткинс жеңіс голын соқты.

Осылайша ағылшындық футболшылар 2:1 есебімен жеңіп, финалға жолдама алды.

Айта кетсек, бұдан бұрын жартылай финалда Испания құрамасы Францияны 2:1 есебімен тізе бүктіріп, финалға берілген алғашқы жолдамаға ие болды.

Енді финалда 14 шілдеде Берлин қаласындағы «Олимпиаштадионда» Испания мен Англия құрамалары кездеседі.