Тоқаев балалар хоккей командасын жеңісімен құттықтады

       Мемлекет басшысы Қасым-Жомарт Тоқаев елордалық Astana Team балалар хоккей командасын Канада жерінде өткен беделді халықаралық дода Quebec International Pee-Wee Hockey Tournament  жарысындағы жеңісімен құттықтады.

       Ақорда таратқан мәліметке сүйенсек, Президент бұл жетістікті отандық спорт тарихындағы айтулы оқиға деп бағалаған. Расында да, мұз айдынында жасындай жарқылдаған жас спортшыларымыз финалда хоккейдің отаны саналатын канадалық қарсыластарынан басым түсіп, жан күйерлерін зор қуанышқа бөледі.

       Мемлекет басшысы олардың жоғары шеберлігі мен қайсар мінезін, жеңіске деген жігерін ерекше атап өтіп, алдағы уақытта да табанды жаттығу мен тынымсыз еңбектің арқасында бұдан да биік белестерді бағындыратынына сенім білдірді.

       Бұл — жас ұрпақтың жігері мен ел намысының айқын көрінісі. Көк туды көкте желбіреткен жас хоккейшілердің жеңісі — барша қазақстандықтарға ортақ қуаныш.