Қазақстан әлемде онлайн қызметтер бойынша 10-орында

БҰҰ-ның былтырғы қорытындысына сәйкес, Қазақстан онлайн қызметтер бойынша 200-ге жуық елдің ішінен 10-шы орынға тұрақтады. Бұл тураплы "Сапалы Қазақстан" порталы qazaqstan.tv сайтына сілтеме жасап хабарлайды. 

 Әр екі жыл сайын жүргізілетін статистикада алдыңғы қатардан көрінуіміздің басты себебі – азаматтардың туғаннан зейнетке шыққанға дейінгі ғұмырының тиімді цифрлануы. Қазақстанның цифрлық технологиялық әлеуеті жайлы Ақниет Балтанованың бейнематериалында.

Былтыр елімізде төлемдердің 90%-ы дәл осылай қолма-қол ақшаны қажет етпеген. QR, карта немесе банк қосымшасы арқылы төлем жасалған. Расында мына телефонымызда бәрі бар. Жеке куәліктен бөлек, салық төлеу, жүргізуші куәлігін жаңарту, кәсіпті тіркеу сынды көптеген қызметтерді онлайн алып жүрміз. Бұл халықтың тұрмысын едәуір жеңілдетті. Дегенмен бұл тұста жеке деректеріңіздің қауіпсіздігі деген мәселе тағы бар, деп айтты "Қазақстан" ұлттық арнасының тілшісі Ақниет Балтанова..

Жеке мәліметіңді жат түгілі жақыныңа тапсыруға жасқанатын заманда түрлі банк қосымшаларынан өз мәліметтерінің ашықтығын байқаған әр азамат оның қауіпсіздігіне күмәнданатыны анық. Әйтсе де, сол деректерді қолдануға рұқсат берген өзіңіз екенін білесіз бе? Банк қосымшасындағы жеке құжаттарыңыз қолжетімді болмасын десеңіз, бұған тосқауыл қоя аласыз.

Қазақстан цифрлық технология жағынан алдыңғы қатарда дедік. Тіпті еліміздің IT жобаларын алыс-жақын мемлекеттерге экспорттадық. Нақтырақ айтсақ, электронды үкімет модульдерін Тәжікстан, Сьерра-Леоне және Того мемлекеттері пайдалануға рұқсат алды. Шетелдіктерді қызықтырғаны азаматтардың туғанынан зейнетке шыққанға дейінгі мәліметтердің цифрлануы.

Айнұр Юсупова, ҚР ЦДИАӨМ Мемлекеттік көрсетілетін қызметтер комитетінің төрағасы:

Бала дүниеге келгенде бірден туу туралы куәлігі дайын болады. Жәрдемақысы түсе бастайды. Цифрлық ҰБТ-ның сертификатын өткіздік. Яғни оны ешкім талап етпейді. Сіз жоғары оқу орнына түскеннен кейін сізге проактивті түрде жатақхана беріледі. Дәл осылай біз әр адамның өмірлік кезеңіне бағытталған қызметтерді ұсыну назарға алынды. Азаматтарға осындай жағдайлар жасалғанын ескере отырып, біз осы 10-шы орынды иеленіп отырмыз.

Технология дамыған жерде, киберқауіпсіздікке баса назар салу – заңдылық. Осы тұрғыда былтырдан бастап мемлекет игілігіне жұмыс істейтін «ақ хакерлер» яғни этикалық хакерлер институты құрылды. Олардың міндеті - мемлекеттік платформалардың, сайттардың осалдығын тексеру әрі азаматтардың жеке деректерінің қауіпсіздігін қорғау.

Бекарыс Қаби, «BUG BOUNTY» жобасының жетекшісі:

Біз Орталық Азияда ең бірінші мемлекет болып ақ хакерлер жөнінде заң қабылдадық. Оған қоса «BUG BOUNTY» платформасы туралы заң қабылданды. 4 жылдың ішінде бізде 3 мыңнан астам этикалық хакер бар. Олар біздің жүйеде тіркелген. Әрқайсысымен біз келісімшартқа отырамыз. Платформаның ережелері бар. Ешқандай заңсыз дүние жасауға болмайды. Деструктив жасауға болмайды. Соны сақтауға міндетті.

4 жыл ішінде «ақ хакерлерге» сұраныс артқан. Яғни өзге мемлекеттер де көмекке жүгінеді. «BUG BOUNTY» жүйесіне Қырғызстан, Өзбекстан елдерінің банктері де тіркелген. Біздің этикалық хакерлер 4 жылдың ішінде 3 мыңнан астам осалдық тапты. Бір ғана eGov периметрінде 300-ге жуық шабуылдың алдын алды. Дегенмен киберқауіпсіздік мемлекеттік органдардың ғана емес, әр азаматтың жауапкершілігі дейді IT мамандары.