Қазақстанда қоқысты белгіленбеген жерге тастағандарға 86 500 теңгеге дейін айыппұл салынады. Ал мұндай әрекетті бір жыл ішінде қайталағандар бұдан да қатаң жазаға тап болуы мүмкін.
Қазақстанда ортақ пайдаланатын орындарды ластағаны үшін әкімшілік жауапкершілік қарастырылған. Ал осы әрекет бір жыл ішінде қайталанса, жаза да қатаңдайды.
Экология және табиғи ресурстар министрлігінің мәліметінше, қаланың тазалығы әр тұрғынның жауапкершілігінен басталады. Алайда кіреберіс алдына тасталған қоқыс, көшеде жатқан бөтелке немесе қоқыс жәшігінің жанына қалдырылған пакет әлі де өзекті мәселе болып отыр. Мұндай әрекеттер қаланың көркін бұзып қана қоймай, айыппұл салуға да негіз болады.
Айыппұл көлемі қанша?
Алғаш рет құқық бұзған адамға 10 айлық есептік көрсеткіш (АЕК), яғни 43 250 теңге айыппұл салынады. Сонымен қатар оған 40 сағатқа дейін қоғамдық жұмысқа тарту жазасы қолданылуы мүмкін.
Егер осындай құқық бұзушылық бір жыл ішінде қайталанса, жаза күшейеді. Бұл жағдайда айыппұл мөлшері 20 АЕК-ке, яғни 86 500 теңгеге дейін жетеді. Бұдан бөлек, құқық бұзушы 80 сағатқа дейін қоғамдық жұмысқа тартылуы мүмкін.
Қаланы таза ұстау әр тұрғыннан басталады
Айыппұлға ұрынбас үшін қарапайым ережелерді сақтау жеткілікті:
- Тұрмыстық қалдықтарды арнайы контейнерлерге тастау;
- саябақтар мен аулаларда қоқыс қалдырмау;
- ортақ пайдаланылатын орындарды ластамау.
Қоғамдық орындардың тазалығына әр тұрғын жауапты. Кейде қоқыс пакетін жәшікке дейін апарып тастаудың өзі ауланың таза болуына септігін тигізіп, артық шығыннан сақтайды.
Айта кетейік, бұған дейін Қазақстанда енді үйдің маңындағы басқа қоқыс үшін де жауапкершілік күшейетіні туралы жазған едік. Жаңа ережеге сәйкес, меншік иелері ауласынан тыс бес метрлік аумақтың тазалығына жауап береді. Ал айыппұл көлемі 432 мың теңгеге дейін жетуі мүмкін.
https://stan.kz/
