Елорданың биылғы алғашқы үшемі №2 қалалық көпсалалық ауруханада дүниеге келді. 

25 жастағы Ажар Қабитова тұңғыш қызы мен егіз балаларынан кейін бірден үш ұлды дүниеге әкелді. 

Осылайша, жас отбасы 6 баланың ата-анасы болды. 

«Балалардың атын әлі қоймадық. Әзірге Әміре, Әлихан, Әмірхан деп ойлап отырмыз. Бес күн дәрігерлер қарауында болдық, бәрі жақсы. Ертең перзентханадан шығамыз», - деді Ажар KAZINFORM тілшісіне берген сұхбатында.

Ажар Қабитова – Семей қаласының тумасы. Астана қаласында Қазақ мемлекеттік заң университетінде білім алған, мамандығы – заңгер. 2020 жылы тұңғыш қызын, 2022 жылы – егіз ұл мен қызын босанған.

Ал 18 қаңтар күні жүктіліктің 34-аптасында кесір тілігі арқылы үшемдер туған. Үш ұлдың салмағы – 2 300, 2 550 3 000 грамм.

«Перинаталдық орталықтың мамандары мен дәрігерлеріне алғыс айтамын. Өмірімнің осы маңызды сәтінде сіздердің қамқорлықтарыңыз, жылулықтарыңыз және кәсібилігіңіз сенімділік пен қауіпсіздік атмосферасын құрды. Жаңа өмірдің басталуына қосқан үлестеріңіз үшін рахмет!», - деп жазды Ажар әлеуметтік желідегі парақшасында. 

Сондай-ақ жас ана көмекші мен бала күтуші алмайтынын, барлық балаға өзі қарайтынын жазған.