Елордада дәстүрлі «KazChess Awards» сыйлығы табысталды. Биыл қатарынан екінші жыл аталған жүлдемен үздік спортшылар, жаттықтырушылар, төрешілер және Қазақстанда шахмат спортының дамуына сүбелі үлес қосып жүрген азаматтар марапатталды. Бұл туралы елорда әкімдігінің ресми сайты жазды.

Биыл номинациялар тізімі 12 санатқа дейін кеңейтілді, өткен жылы 9 номинация болған. 

Жеңімпаздар Қазақстан шахмат федерациясы президиум мүшелерінің дауыс беру жолымен таңдалды. Жеңімпаздарды анықтау кезінде спортшылардың халықаралық және республикалық жарыстардағы жеке көрсеткіштері ескерілді. 

Фото: gov.kz

Астана қаласының бұрымды спортшылары да сол он екі аталымның үздіктер қатарынан көрінді. Атап айтар болсақ, Динара Сәдуақасова, Амина Каирбекова мен Меруерт Камалиденова «Үздік команда» аталымын жеңіп алды. 

Фото: gov.kz

Естеріңізге салсақ, Қытай елінің Ханчжоу қаласында өткен XIX Жазғы Азия ойындарында шахматтан Қазақстанның әйелдер құрамасы қола жүлде иеленген болатын. Құрама сапында қазақстандық бес спортшы өнер көрсетті. Оның екеуі Астана қаласының бұрымды шахматшылары Меруерт Камалиденова мен Динара Сәдуақасова. 

Фото: gov.kz

Спорттың осы түрін дамытуға бағытталған «Мектептегі шахмат» жобасы аясында бүгінде 983 мектепте зияткерлік ойын сабақтары өткізіледі. Оның ішінде 110 мектепте міндетті пән ретінде оқытылады. Сондай-ақ 2023 жылы 2 мыңнан астам қатысушыны қамтыған әуесқойлар арасында шахматты насихаттауға бағытталған «Шахмат керуені» республикалық жобасы іске асырылды.