АҚШ, Канада және Мексикада өтетін XXIII ФИФА әлем чемпионатының басталуына санаулы күндер қалды. Алғаш рет 48 ұлттық құрама қатысатын бұл тарихи турнир 2026 жылдың 11 маусымы мен 19 шілдесі аралығында өтеді. Жанкүйерлер 104 қызықты матчты тамашалай алады.
Канаданың Торонто қаласында Әлем чемпионатына екі аптадай уақыт қалғанда 2,5 миллион доллардың жалған футбол формалары мен екі кубок тәркіленді. Бұл туралы "Сапалы Қазақстан" порталы "Қазақстан" ұлттық арнасына сілтеме жасай отырып хабарлайды.
Спорттық киімдер мен тулар ФИФА-ның және Nike, Adidas, Puma тәрізді брендтердің символикаларымен безендірілген. Сонымен қатар рейд барысында екі адам тұтқындалып, оларға айып тағылды.
Айта кетсек, Торонтоға алдағы жаһандық матчтар кезінде 300 мыңдай адам барады деген болжам бар. Олар алты ойынды, соның ішінде Канада мен Босния-Герцеговина командаларының кездесуін маусымның 12-де көре алады.
Айта кетсек, 2026 жылғы әлем чемпионаты матчтарын республика бойынша көрсетудің теледидарлық құқықтары тек Қазақстан телерадио корпорациясына тиесілі. Елде хабарларды басқа платформалар немесе шетелдік БАҚ арқылы таратуға тыйым салынады.
Қазақстандық жанкүйерлер барлық ойындарды Qazaqstan және Qazsport арналарында заңды және тегін тікелей эфирде көре алады.
Мобильді қолжетімділікті қалайтындар үшін онлайн хабар тарату qazaqstan.tv және qazsporttv.kz сайттарында, ресми Qazaqstan.tv қосымшасында және birge.tv ағындық платформасында қолжетімді болады. Матчтардың өзінен басқа, көрермендер сарапшылардың қатысуымен матч алдындағы талдау студияларын және Америкадағы оқиға орнынан тікелей түсірілім тобының тікелей хабарларын көре алады.
Ақпарат digitalbusiness.kz, qazaqstan.tv сайттарынан алынды.