Қыз бала мен ер адам құдыққа түсіп, қайтыс болды

Ақтөбе облысындағы Жарлы ауылында кішкентай қыз бен ер адам құдыққа түсіп қаза болды. Бұл туралы "Сапалы Қазақстан" порталы azattyq-ruhy.kz сайтына сілтеме жасап  хабарлайды. 

Төтенше жағдайлар департаментінің мәліметінше, 17 маусым күні тереңдігі 10 метрге жуық ескі құдыққа 9 жасар қыз бала құлап кеткен. Баланы құтқармақ болған Нұрбол атты 38 жастағы спортшы оның артынан құдыққа түскен, өкінішке қарай олар қайтадан шыға алмай қалған.

Алдын ала болжам бойынша, құдықтың түбінде оларға ауа жетпей қалған, не болмаса улы газдарға тұншыққан. Қыз бен ер адамды құтқарушылар ес-түссіз күйде жер бетіне алып шыққан. Дәрігерлер дер кезінде келіп, шара қолданса да екеуі де қайтыс болды.

Қыз құлаған құдық ұзақ уақыт бойы пайдаланылмаған. Оның беті ашық, ішіне қоқыс толып жатқан, қорғаныс қақпағы немесе қоршауы болмаған.