Көліктің апаттық ескерту жарығын қосып, жол жиегінде қанша тұруға болады?

Көп жүргізуші жол жиегіне қысқа уақытқа тоқтаған кезде апаттық сигнал жарығын қосып тұрады. Алайда мұндай жағдайда қанша уақыт тұруға болатынын және қандай жағдайларда айыппұл салынатынын бәрі бірдей біле бермейді.

Қанша уақыт тұруға болады?

Жергілікті полиция қызметі басқарма басшысының орынбасары Тимур Ноғайбаевтың айтуынша, Қазақстанның Жол қозғалысы ережелерінде нақты уақыт шектеуі көрсетілмеген, бірақ маңызды талаптар бар.

Егер көлік рұқсат етілмеген жерде тұрса, апаттық жарық қосулы болса да, жүргізуші жауапкершіліктен құтыла алмайды. Жол жиегіне тек басқа көлік қозғалысына кедергі келтірмейтін жағдайда ғана тоқтауға рұқсат етіледі.

Егер көлік ұзақ уақыт тұрса, әсіресе жүргізуші көліктен кетіп қалса, бұл мәжбүрлі тоқтау емес, тұрақ ретінде қабылдануы мүмкін. Мұндай жағдайда айыппұл қарастырылады.

Жүргізуші көлікте отыруы тиіс пе?

Иә, бұл маңызды. Егер көлік апатты жарықпен жол жиегінде тұрса, жүргізуші оның ішінде немесе қасында болуы тиіс. Егер ол жоқ болса, инспектор бұл тұрақ ережесін бұзу деп санай алады.

Айыппұл мөлшері қандай?

Жағдайға байланысты. Жүргізушіге ӘҚБтК-нің 597-бабы 3-бөлігі ("Тыйым салынған жерде көлікті тұраққа қою") бойынша 19 660 теңге (2025 жылы – 5 АЕК) көлемінде айыппұл салынуы мүмкін. Егер көлік қозғалысқа кедергі келтірсе, оны эвакуациялауы да мүмкін.

Полиция шақыруға бола ма?

Иә, ведомство өкілінің айтуынша, егер жүргізуші көлікті апаттық жарық сигналын қосып қалдырып, өзі кетіп қалса және көлік жолды, жаяу жүргіншілер өткелін жауып тұрса не қауіп төндірсе, 102 нөміріне хабарласып, полицияны шақыруға болады.

Көліктің маркасын, нөмірін және нақты тұрған жерін көрсетсеңіз, полиция шара қабылдауға тиіс, қажет болса, эвакуация жасалады.

https://kaz.tengrinews.kz/