Солярий қауіпті ме, пайдалы ма? Маман кеңесі

Кейбір қыз-келіншек қыс айларында терісінің қоңырқай тартқанын қалап, осы мақсатта солярийді таңдайды. Ал ол күн сәулесіндей бола ала ма? СҚО санитариялық-эпидемиологиялық бақылау департаменті коммуналдық объектілерді бақылау және қадағалау бөлімінің жетекші маманы Айгүл Мурталимова солярийдің пайдасы мен зияны жайлы айтып берді, деп жазды kaz.inform.kz. 

- Айгүл Оралқызы, әр заттың оң және кемшін тұсы болатыны белгілі. Солярийге келер болсақ, алдымен пайдасын айтып беріңізші...

- Ең алдымен, солярийге бармас бұрын косметологпен немесе дерматологпен кеңескен жөн. Өйткені, адамдардың бәріне бірдей ол жаға бермейді, қарсы көрсетілімдер бар.

Күнге күю арқылы әйелдер көп жағдайда терідегі әртүрлі кемшіліктерді жасырады. Алайда біздің өңірде күн ванналарын жыл бойы ала алмаймыз, сондықтан солярийді қолдануға болады. Оның ең бірінші пайдасы – ағзаны Д дәруменінің қажетті дозасымен қамтамасыз етеді, бақыт пен қуаныш гормонын - серотонин мен эндорфин өндіреді, соның арқасында адам шаршау сезімінен арылып, көңіл-күйі жақсарады. Солярийдің босаңсытатын, тыныштандыратын, бактерияға қарсы және егер безеу болса және оның гормоналдық бұзылысқа қатысы болмаса, теріні қалпына келтіретін әсері бар. Сондай-ақ, теріге жағымды түс береді. 

Ультракүлгін сәуле иммунитетті жақсартады, нәтижесінде ЖРВИ, тұмаумен сирек ауырасыз.

- Ал қандай кері әсері бар?

- Ультракүлгін сәулелер сізде жоғары немесе төмен қысым, бронх демікпесі, туберкулездің белсенді түрі, қан аурулары, ісіктер, варикозды тамырлар, қалқанша безінің аурулары болса, аурудың өршуіне әкелуі мүмкін.

Сондықтан солярийге үнемі және бақылаусыз баруға болмайтынын есте ұстаңыз. Ультракүлгін сәуле терінің қатерлі ісігіне, терінің ерте қартаюына, қауіпсіздік ережелерін сақтамаған жағдайда күйік алу қаупі жоғары. Шашты бас киіммен қорғамаған жағдайда шашқа зақым келеді, сондай-ақ көздің қабынуы және катарактаға әкелуі мүмкін.

Барлық артықшылықтар мен кемшіліктерді, тәуекелдер мен қарсы көрсетілімдерді есепке алып, солярийге анда-санда барып, жасанды күн энергиясын дұрыс пайдаланған жағдайда оның пайдалы тұстары көп.

- Демек, солярийге бармас бұрын белгілі бір дайындықтан өткен жөн ғой?

- Солярийге алғаш рет барар алдында міндетті түрде дерматологпен кеңесу керек. Терінің фототипін анықтаңыз, соған байланысты ұсынылған сеанстар ұзақтығын қатаң сақтаңыз.

Ал терінің әдемі түсін алу үшін солярийге барардан бір-екі күн бұрын скрабпен дұрыстап жуынған жөн. Ал кірерден 2-3 сағат бұрын таза сумен шайынуға кеңес беремін. 

Солярий ағзаға зиян әкелмеуі үшін көзді қорғау керек. Жай жұмған жеткіліксіз, ультракүлгін сәуле көзге өтпеуі үшін арнайы көзілдірік киген дұрыс.

Фото: pixabay.com.

Бірінші сессия 3-5 минуттан болса, ал қалғандары 10 минуттан апауы керек. Солярийге барғаннан кейін кем дегенде 2 күн үзіліс жасау ұсынылады. Терінің біркелкі әдемі түсін алғыңыз келсе, солярий курсы 8-10 сеанс болғаны жөн. Бір жарым-екі айдан кейін оны қайталауға болады.

Солярийге дезодорант, иіссу жағып, макияж жасап баруға болмайды. Теріде жаралар болса солярийден бас тартқан жөн.

Сондай-ақ мең, татуажды арнайы қорғаныш жапсырмамен жабуға кеңес беремін.

Процедурадан кейін тері құрғайды, сондықтан арнайы ылғалдандырғыш кремдерді қолдану маңызды. Ал тері қызарып, ультракүлгін сәулелермен белсендірілген бос радикалдардың әсерін жоюға көмектесетін Е дәрумені бар косметикалық өнімдерді пайдаланған жөн.

Солярийге барған күні жоғалған ылғалдың орнын толтыру үшін көбірек сұйықтықты тұтыну қажет.