Мектеп психологтарының біліктілігі өте төмен

       — Елімізде педагог-психологтардың біліктілігін арттыру курсының мазмұнын өзгертіп жатыр. Бұл туралы Оқу-ағарту министрінің орынбасары Еділ Оспан мәлім етті.

       — Мамандардың біліктілік мәселесін шешу керектігімен келісеміз. Мектепте жұмыс істеп жүрген педагог-психологтардың, психологиялық қолдау орталықтарынан келіп жатқан мамандардың біліктілік деңгейі өте төмен екенін көріп отырмыз. Бірнеше рет талдау жасадық, ендігі қолымыздан келетіні біліктілікті арттыру курстарынан өткізу, бұл жыл сайын жасалып келе жатыр. Қазір біліктілік курстарының мазмұнын қайта қарап жатырмыз, — деді Еділ Оспан Мәжіліс қабырғасында өткен іс-шара барысында.

       Одан әрі вице-министр педагог-психолог мамандарын даярлау мәселесіне тоқталды.

       — Бұл бағытта Ғылым және жоғары білім министрлігімен бірлесіп жұмыс істеп жатырмыз. Біздегі ақпарат бойынша, педагог-психологтарды даярлаудың жаңартылған модулі осы оқу жылында енгізілді, — дейді ол.

       Бүгін Мәжілістің Әлеуметтік-мәдени даму комитетінде психология қызметінің проблемалары мен шешу жолдары қаралды.

       Айта кетейік, елімізде психологиялық қызмет туралы арнайы заң жобасы қолға алынды. 
Мәжіліс депутаты Асхат Аймағамбетов елімізде психологиялық қызмет көрсетудің тиісті нормалары бар, бірақ ол шашыраңқы екенін айтты.

       https://kaz.inform.kz/