Каспий итбалығы туралы ашық дереққор құрылады

Орталық Азия экологиялық зерттеулер институтының (CAIER) бастамасымен Каспий итбалығына қатысты барлық зерттеу нәтижесі ашық ақпараттық базада жинақталады.

Институт мамандары 10 жылдан бері Каспий теңізіндегі экологиялық проблемалармен айналысып келеді. Каспий итбалығының популяциясын сақтау бойынша ғылыми-зерттеу жұмыстары да жүргізіледі. Осы уақытқа дейін теңіздегі биоалуантүрлілік саласында жұмыс істейтін халықаралық ғалымдардың қатысуымен 9 экспедиция ұйымдастырылды.

"Каспий итбалығы популяциясының азаю себептерін зерттеу үшін ғылыми зерттеулер қолжетімді болуы қажет, ал олардың көпшілігі қазіргі уақытта бөлек-бөлек және әрбіреуіне қол жеткізу қиын. Біздің институтымыздың ғалымдары ғылыми-зерттеу жұмыстарын жүргізген 10 жылдың ішінде бірегей талдау жасалып, кең ауқымды дерекқор жиналды. Біз ашық big date құруды жоспарлап отырмыз, ол отандық және халықаралық ғалымдарға Каспий итбалығын және бүкіл Каспий маңы аймағын сақтап қалу үшін күш-жігерімізді біріктіруге мүмкіндік береді", - дейді Орталық Азия экологиялық зерттеулер институтының негізін қалаушы, эколог Әсел Тасмағамбетова.

Ақпан айының басында CAIER Каспий теңізіне жүргізген кезекті ғылыми-зерттеу экспедициясы аяқталды, оған Ұлыбритания, Қазақстан және АҚШ ғалымдары, сондай-ақ BBC халықаралық телеарнасының түсіру тобы қатысты.

Экспедиция барысында сырқаттанған Каспий итбалықтарына ветеринарлық жәрдем көрсетіліп, судың, қар жамылғысының сынамалары алынып, бірқатар бірегей сараптама жүргізілді. Сондай-ақ жануарларға жеңілдетілген биометриялық бақылау құрылғылары орнатылды. Соның арқасында температура, қысым/тереңдік, GPS орналасуы, жүру жылдамдығы, бағдары және тағы басқа мәліметтерді бақылап отыруға болады.

Танымал ғалым Даниель Коста да CAIER экспедициясына қатысты.

"Біз талдау нәтижелерін тағатсыздана күтеміз, өйткені бұл итбалықтардың қан көлемін, стресс физиологиясын, тамақтануының мінез-құлық ерекшеліктерін, көбеюге жұмсайтын энергея шығынын, гематологиялық көрсеткіштерін, сүтінің құрамын және т.б. көп нәрсені тереңірек түсінуімізге көмектеседі. Бізді осы экспедицияға қатысуға шақырғандарыңыз үшін алғыс айтамыз және осы бірегей түрдің экологиясы мен денсаулығын зерттеуді қуана жалғастырамыз", - деп атап өтті ғалым.

Қазіргі уақытта барлық сынама жоғары технологиялық зертханаға жіберілді. Ал талдау нәтижелері Каспий итбалығы туралы бірыңғай дерекқорға енгізіледі.

ҚазАқпарат