Елімізде бала асырап алуда әкімшілік кедергілер көп кездеседі

Сенатор Геннадий Шиповских өзінің депутаттық сауалында бала асырап алудағы әкімшілік кедергілер мен ата-ананың қамқорлығынсыз қалған балаларды қорғау жүйесінің тиімсіздігіне байланысты проблемаларды атап өтті.

- Оқу-ағарту министрлігінің мәліметінше, қазір елімізде 21 387 жетім және ата-анасының қамқорлығынсыз қалған бала бар. Мемлекетіміз балалар үйінде тәрбиеленіп жатқан жетім балаларды отбасылық ортаға орналастыру үшін түрлі шаралар қабылдап отыр. Алайда, статистикалық деректерге қарағанда, бала асырап алу үрдісі баяу жүріп жатыр. Мәселен, 5 мыңнан астам азамат бала асырап алу кезегінде тұрғанымен, 2023 жылы – 194, 2024 жылы – 153 бала жаңа отбасын тапқан. Бұл көрсеткіштер бала асырап алу жүйесіндегі әкімшілік кедергілердің бар екенін және процестің ұзаққа созылатынын аңғартады, - деді Г. Шиповских Сенаттың жалпы отырысында.

Оның айтуынша, мемлекет тарапынан қабылданып жатқан бағдарламалар мен заңнамалық іс-шаралар жетім балалардың шынайы қажеттіліктеріне сай болуы керек.

- Өкінішке қарай, көптеген жетімдеріміз балалар үйінде тәрбиеленіп, отбасының жылуын сезінбей өседі. Бұл олардың болашақта қоғамға бейімделуін қиындатады. Бала асырап алу рәсімін жеңілдету және оны цифрландыру, құжаттарды рәсімдеу мен қажетті тексерістерді онлайн форматта өткізу арқылы үміткерлер үшін процесті оңайлату қажет. Жетім балаларды отбасылық ортада тәрбиелеу саясатын күшейту, қамқоршылық пен патронаттық тәрбие жүйесін жетілдіру, патронаттық тәрбиешілерге төленетін қаржылық қолдауды арттыру маңызды. Қоғамдық бақылауды күшейту және асырап алу процесінің ашықтығын қамтамасыз ету үшін үкіметтік емес ұйымдар мен қоғам белсенділерін тарту керек. Бала асырап алу саласындағы заңсыздықтарға күресті күшейту қажет, сыбайлас жемқорлық тәуекелдерін азайту үшін қатаң бақылау шараларын енгізу маңызды», - деді Геннадий Шиповских.

https://kaz.inform.kz/