Қазіргі уақытта жергілікті атқарушы орган жобаның техникалық-экономикалық негіздемесіне талдау жүргізіп, оны әзірлеуде

Үшрал қаласының әуежайында жаңа терминал салынады. Бұл туралы көлік министрі Марат Қарабаевтың Жетісу өңірі тұрғындарымен кездесуінде айтылды, деп хабарлады ведомствоның баспасөз қызметі.

Министрліктің хабарлауынша, қазір жаңа терминал құрылысына қатысты екі нұсқасы қарастырылып жатыр.

"Біріншісі - ғимараттарды келу және кету аймақтарына бөле отырып, қолданыстағы терминалдың жанынан шағын терминал салу; екіншісі – бірден үлкен терминал салу. Қазіргі уақытта жергілікті атқарушы орган жобаның техникалық-экономикалық негіздемесіне талдау жүргізіп, оны әзірлеуде", - деп жазылған хабарламада.

Сондай-ақ, бүгінгі таңда "Сарыөзек-Көктал" жолының 45-68-ші шақырымдары арасында күрделі жөндеу, ал 68-110 шақырымдары арасында орташа жөндеу жұмыстары аяқталды. Келесі жылы 0-ден 45-ші шақырымға дейін орташа жөндеу жұмыстары жүргізіледі. Тиісінше, жол толығымен ретке келтіріледі.

Жалпы ұзындығы 762 шақырымды құрайтын "Талдықорған-Қалбатау-Өскемен" жолын қайта жаңғырту жұмыстары да 2024 жылдың соңына дейін аяқталады.

ҚазАқпарат