Илон Масктың Neuralink компаниясы мидың көру қыртысы зақымданбаған соқырлардың көру қабілетін қалпына келтіретін Blindsight құрылғысына рұқсат алды, деп жазады kaz.inform.kz. 

Tesla бас директоры Илон Маск өзінің ми чипі Neuralink стартапы АҚШ-тың Азық-түлік және дәрі-дәрмек басқармасынан «тіпті екі көзі мен көру жүйкесін жоғалтқандардың да көруіне мүмкіндік беретін» тәжірибелік имплантацияланатын құрылғыға рұқсат алғанын хабарлады.

– Neuralink's Blindsight құрылғысы екі көзі мен көру жүйкесін жоғалтқандарға да көруге мүмкіндік береді. Мидың көру қыртысы зақымданбаған жағдайда, ол тіпті туғаннан зағип болғандардың да бірінші рет көруіне мүмкіндік береді, - деп жазды Илон Маск Х әлеуметтік желісіндегі парақшасында.

Илон Маск көрудің бастапқы сапасын ертедегі бейне ойын графикасы ретінде сипаттады, бірақ болашақта ол табиғи көру қабілетінен, соның ішінде инфрақызыл, ультракүлгін немесе радиолокациялық толқын ұзындығын қабылдау қабілетінен асып түсуі мүмкін деп болжады.