Астанада V Дүниежүзілік көшпенділер ойындары аясында этноауыл ашылады. Оған республиканың әрбір өңірі өз керуенін жіберіп, қазақтың төл өнері мен мәдениетін көрсетеді. Ойындарға қатысатын өзге елдер де шатырын тігеді. Sputnik Қазақстан ең үлкен этноауылдың эскизін ұсынады.

Бірлік керуені

Дүниежүзілік көшпенділер ойындарына дейін "Бірлік керуені" ұйымдастырылады. Соның аясында әрбір облыс пен республикалық маңызы бар қала үш киізден тұратын аймақтық керуенді аттандырады. Әрбір керуенде "Көшпенділер ғаламы" этноауылын ұйымдастыруға қажетті құрал-жабдықтың барлығы болуы шарт.

Дүниежүзілік көшпенділер ойындары өтетін нысандардың бірі - "Қазанат" ипподромы. Қазіргі кезде оны күрделі жөндеуден өткізіп, жаңа нысандар салып жатыр. Ал ипподромның артында ең үлкен этноауыл ашылады.

Бір апта бойы ұлан-асыр той болады

V Дүниежүзілік көшпенділер ойындарының дирекция басшысы Наиль Нуровтың айтуынша, Астанадағы этноауылда 7 күн бойы ұлан-асыр той болады. Ол жерде үздік аспаздар, қолөнершілер мен өнерпаздар жиналады.

"Осылайша, 7 күн бойы ұлан-асыр мәдени той болады. Қонақтар қазақ халқының төл мәдениетімен жақын таныса алады. Сол сияқты өзіміздің отандастарымыз үшін этноауылда басқа елдердің ұлттық өнері мен мәдениетін көруге мүмкіндік болады. Себебі ойындарға қатысушы әрбір мемлекет ол жерге өз этножобасын алып келеді", - дейді Нуров.

Этноауыл дың мәдени бағдарламасы этникалық ән-би, вокалдық қойылымдар, театрландырылған көріністер мен концерттерден тұрады. Ұйымдастырушылар "мәдени рухани калейдоскоп" болады деп отыр.

Этноауылдың аумағы

Этноауылдың жалпы көлемі автотұрақтармен бірге 10 гектарды құрайды. Онда бірнеше локацияа болады. Біріншісі - Тайқазан орнатылған орталық алаң.

Бұдан бөлек, ұлттық ойындар мен балалардың ойын алаңы, ұлттық тағамдар, басты сахна, аймақтардың этно қоныстары, мүсіншілер фестивалінің алаңы, шығыс базары мен қолөнершілер қалашығы болады.

Ұлы дала дүбірі

V Дүниежүзілік көшпенділер ойындары "Ұлы дала дүбірі" ұранымен өтеді. Алау эстафетасы да ұйымдастырылады. Бірақ бұған дейінгі көшпенділер ойындарының басты қасиетті нышаны және негізгі элементі су болды. Осы жолы да солай қалады. Ол үшін жергілікті қасиетті бұлақтардың бірінен су алынады. Оны орталық көшелермен де ұстап өтеді. Сосын өңірдің дәстүрі мен стилінде безендірілген керуен су толтырылған ыдыспен бірге Астанаға аттанады. Ал ойындардың салтанатты ашылу рәсімінде еліміздің барлық аймағынан келген батырлар қасиетті су толтырылған торсықтарды ұстап шығады.

Айта кетері, биыл 8-14 қыркүйек аралығында Астанада Дүниежүзілік көшпенділер ойындары өтеді. Оған 100-ден астам елдің өкілдері қатысады деген жоспар бар. Әлемнің түкпір-түкпірінен көшпенді емес мемлекеттерден де командалар келеді.

V Дүниежүзілік көшпенділер ойындарының бағдарламасы мен билет сату тәртібімен мына жерде танысуға болады.

 ҚазАқпарат