Мексиканың оңтүстік-шығысындағы тропикалық ормандардағы құрып кету қаупі төнген бақырауық маймылдар соңғы апталарда құрғақшылық пен қатты аптап ыстықтан қырылып жатыр.  Бұл туралы "Сапалы Қазақстан" порталы kaz.inform.kz сайтына сілтеме жасап хабарлайды. 

Осы аптада ауаның температурасы 45 градустан жоғары көтеріледі деп болжанған Табаско штатында жергілікті БАҚ 85 маймылдың қырылғаны туралы хабарлады. Билік бұны растады, бірақ қырылған жануарлардың нақты санын ұсынған жоқ.

Камалькалько қаласының маңындағы орманда, Табаскода еріктілер ыстықтан өлген колумбиялық өкіретін маймылдардың (alouatta palliata) өлекселерін жинап, жануарлар өлімінің алдын алу үшін су мен жеміс-жидек құйылған шелектерді қойды.

Колумбиялық бақырауық маймыл Халықаралық табиғатты қорғау одағының Қызыл тізімінде «осал» санатқа енгізілген.

«Бұл сондай қатты ыстықтың кесірінен болып жатқан жағдай. Мен бұл штаттарда ұзақ уақыт тұрдым, бірақ бұған дейін осыншама аптап ыстықты сезінбеген едім. Сондықтан біз жануарларға қамқорлық танытуымыз керек және біз соны істейміз», - деді Табаскодан келген Мексика президенті Андрес Мануэль Лопес Обрадор.

Мексиканың қоршаған ортаны қорғау министрлігі кейінірек маймылдар өлімін жою бойынша күш-жігерді үйлестіретінін мәлімдеп, олардың қырылуын бірнеше ықтимал себептермен, соның ішінде ыстық соғу, сусыздану, дұрыс тамақтанбау немесе ауылшаруашылық дақылдарын улы агрохимикаттармен бүркумен байланыстырады.

Мексикада, сонымен қатар, ормандардың кесілуіне байланысты Қызыл кітапта «жойылып кету қаупі төніп тұрғандар» тізіміне енген орталықамерикалық бақырауық маймыл мекендейді.

Мексиканың Денсаулық сақтау министрлігі 17 наурыз бен 11 мамыр аралығында аптап ыстықтан елде шамамен 26 адам қайтыс болғанын хабарлады.