Самарқанд шаһарында 7-12 маусым күндері аралығында «Voice Up» халықаралық инклюзивті жастар лагері ұйымдастырылып жатыр. Аталған шараға Қазақстаннан да арнайы делегация қатысуда.
Еліміздің атынан барған топ құрамында мемлекеттік мекемелердің өкілдері, инклюзивті білім беру бағытында еңбек етіп жүрген мамандар бар. Сонымен қатар қоғамдық жұмыстарға белсенді араласып жүрген жастар да осы сапардың қатысушылары қатарында.
Әлеуметтік маңызы бар жобаларды жүзеге асырып жүрген бастамашыл жастар мен жоба жетекшілері халықаралық алаңда өз тәжірибесін таныстыру мүмкіндігіне ие болды.
Лагерьдің басты мақсаты – ерекше қажеттілігі бар жастардың қабілетін дамытуға қолдау көрсету. Сондай-ақ түрлі елдерден келген қатысушылар арасында байланыс орнатып, өзара ықпалдастықты күшейту көзделген.
Бірнеше күнге жоспарланған бағдарлама аясында форумдар, оқыту кездесулері мен тәлімгерлік алаңдары өтеді. Қатысушылар өз жобаларын таныстырып, жаңа бастамалар жөнінде пікір алмасады.
Сонымен бірге мәдени шаралар мен ашық талқылаулар ұйымдастырылып, жастар өз ойларын ортаға салуға мүмкіндік алады. Мұндай халықаралық кездесулер еріктілік мәдениетін насихаттап, жастардың қоғамдық белсенділігін арттыруға ықпал етеді.