Алматыда жаңа стадион: үлкен футболға жасалған қадам

       Алматыда алдағы жылдары заманауи, ірі футбол стадионы бой көтермек. Жаңа спорт нысаны бір мезетте қырық бес мыңға жуық жанкүйерді қабылдай алатын болады.

       Қазіргі таңда бұл жоба дайындық кезеңінде. Мамандар стадионның жобалық құжаттарын әзірлеумен айналысып жатыр. Болашақ нысан қаланың Медеу ауданында, Құлжа тасжолы бойында орналасады деп жоспарланған.

       Жаңа стадион халықаралық талаптарға сай салынады. Атап айтқанда, UEFA-ның ең жоғары санатына сәйкес келетін спорт аренасы болады. Алаңға табиғи көгал төселіп, көрермендерге қолайлы жағдай жасау үшін кең автотұрақ та қарастырылған.

       Мамандардың айтуынша, құрылыс жұмыстары толық аяқталып, стадион екі мың жиырма жетінші жылдың соңына қарай пайдалануға берілуі мүмкін. Ал жобаның нақты құны барлық құжаттар тиісті сараптамадан өткен соң белгілі болмақ.

       Бұл стадион – тек футбол алаңы ғана емес, Алматының спорттық рухын көтеретін, жанкүйерлерді біріктіретін жаңа орталыққа айналады деген үміт зор.