Онлайн сауда ережесі өзгереді

Елімізде онлайн сауда ережелері өзгереді. Енді кедендік одаққа мүше емес елдің интернет-дүкендерінен алынған тауарлар «жеке пайдалануға арналған зат» емес, электрондық сауда тауарлары ретінде қарастырылады. Бұл туралы "Сапалы Қазақстан" порталы qazaqstan.tv сайтына сілтеме жасап хабарлайды. 

Жаңа тәртіпке сәйкес, шетелден онлайн жеткізілетін тауардың құны 200 еуродан төмен болса, кедендік баж бен қосылған құн салығы салынбайды. Ал бұл шектен асқан жағдайда бүкіл сатып алу сомасына 5 пайыз баж салығы және 16 пайыз қосылған құн салығы есептеледі. 

Баждың ең төменгі мөлшері бір келі үшін 1 еуро мөлшерінде белгіленді.

 Алкоголь, темекі өнімдері, бағалы металдар мен тастар бұрынғыдай жеке декларация арқылы рәсімделеді. Ал автокөлік пен электромобиль секілді ірі тауарларға бөлек талаптар сақталады. 

Мамандар бұл өзгерістер салық түсімін арттыру және ішкі нарықта әділ бәсекелестік орнату үшін енгізілгенін айтады.

Фото: pixabay.com.

ЕАЭО Кеден кодексіне енгізілген түзетулерге сәйкес, жеке тұлғалардың шетелдік веб-сайттарда тапсырыс берген тауарлары енді бөлек санат ретінде жіктеледі. Оларды арнайы электрондық коммерция операторы - тізілімде тіркелген заңды тұлға өңдейді.

Түзетулерге кедендік декларацияның жаңа түрі және жеткізудің екі форматы да кіреді.

«Тауарларды шетелдік сатушыдан сатып алушыға тікелей жеткізуге болады. Жеткізу сатып алушы еліндегі электрондық коммерция операторының қоймасынан кедендік қойма деп аталатын орын арқылы да мүмкін. Бұл әдіс тапсырысты алуды айтарлықтай жылдамдатады», - деп хабарлады Мемлекеттік кіріс комитеті.

Жаңа ережелер одақтың барлық мүше елдерінде ратификациялау рәсімдері аяқталғаннан кейін күшіне енеді.