Ақтауда теңіз вокзалы салынады

Бұдан бөлек, қалада халықаралық деңгейдегі стадион салу да көзделіп отыр

Үкімет "Маңғыстау" туристік аймағын дамытудың 2025–2029 жылдарға арналған кешенді жоспарын бекітті.

Құжатта 9 бағыт бойынша салалық мәселелерді жүйелі шешу қарастырылған.

12 туристік нысанның ішінде өңірдегі туризмді дамытудың негізгі бағыттарының бірі Кендірлі туристік аймағы болып белгіленді. Инфрақұрылымдық мәселелерді шешу, оның ішінде инженерлік коммуникациялар жүргізу, туристік нысандарды электр қуатымен, сумен жабдықтау және көлік қолжетімділігімен қамтамасыз ету бойынша шаралар кешені іске асырылады.

"Кендірлі ауылында жолдар мен басқа да нысандарды жөндеуден бөлек, әуежай салынады. Бұл ретте инвесторлар мен эко-белсенділердің ұсыныстары ескерілді. Сонымен қатар, Ақтау қаласында теңіз вокзалы мен халықаралық деңгейдегі стадион салу жоспарланып отыр", - деп жазылған хабарламада.

Кешенді жоспар мәдени-спорттық іс-шаралар өткізуді, "Каспий ӘКК" АҚ желісі арқылы туризм саласын жеңілдетілген несиелеу бағдарламасын іске қосуды да қамтиды.

Жоспар жүзеге асырылғаннан кейін 2029 жылға қарай ішкі туристер саны 430 мыңнан 520 мың адамға, ал келуші туристер санын 89 мыңнан 143 мың адамға дейін артады деп күтіліп отыр.

ҚазАқпарат