Алматы облысында тауда қураған шөп өртеніп жатыр

Елді мекендерге қауіп төніп тұрған жоқ

Алматы облысында тау бөктерінде қураған шөп өртеніп жатыр, деп хабарлайды облыстық ТЖД баспасөз қызметі.

"Алматы облысы Төтенше жағдайлар департаментінің "112" қызметіне Алматы облысы Қарасай ауданы Райымбек ауылдық округінде орналасқан бау-бақша кооперативі аумағында таулы аймақта қураған шөп өртеніп жатқаны туралы хабарлама келіп түсті", - деп жазылған хабарламада.

Оқиға орнына жеткен кезде ашық таулы жерде қураған өсімдіктердің өртеніп жатқаны анықталды. Өрттің алдын ала аумағы 7-8 гектарды құрайды.

"Тік бедерлер мен өрлер өртті сөндіру жұмыстарын қиындатып отыр. Қаза болғандар мен зардап шеккендер жоқ. Елді мекендерге қауіп төніп тұрған жоқ", - дейді құтқарушылар.

Өртті сөндіруге Алматы облысы мен Алматы қаласы Төтенше жағдайлар департаментінің 70-ке жуық қызметкері мен 9 бірлік техникасы, жергілікті атқарушы органдар мен орман шаруашылығы қызметкерлері жұмылдырылды.

Жағдай Төтенше жағдайлар министрлігінің бақылауында. Өртті сөндіру жұмыстары жалғасып жатыр.

ҚазАқпарат