Цифрлық қауіпсіздік әр адамнан басталады: Алматыда киберқауіптерден қорғану мәселелері талқыланды
Almaty Hub кеңістігінде Almaty Hub пен Алматы қаласының әкімдігі бірлесіп ұйымдастырған «Кибергигиена: цифрлық әлемдегі қорғаныс» атты іс-шара өтті. Кездесуге 180-нен астам адам қатысып, ақпараттық қауіпсіздік, цифрлық сауаттылық және дербес деректерді қорғау саласындағы сарапшылардың басын қосты, деп хабарлайды "Сапалы Қазақстан" порталы.
Фишингтік шабуылды қалай тануға болады?
Жеке деректерді қалай қорғауға және телефон алаяқтарына қалай қарсы тұруға болады? Жұмыс орнында ақпараттық қауіпсіздікті қалай қамтамасыз ету керек? Цифрлық технологиялар күнделікті өмірдің, жұмыс пен мемлекеттік және қаржылық сервистерді пайдаланудың ажырамас бөлігіне айналған сайын, бұл мәселелердің өзектілігі артып келеді.
Бірнеше аккаунтта бірдей құпиясөзді пайдалану, күмәнді сілтемелерге өту немесе құпия ақпаратты бейтаныс адамдарға беру сияқты үйреншікті әрекеттер жеке пайдаланушыларға да, ұйымдарға да қауіп төндіруі мүмкін. Сондықтан цифрлық сауаттылық пен кибергигиена ережелерін сақтау жеке және корпоративтік қауіпсіздіктің маңызды құрамдас бөлігіне айналып отыр.
Іс-шара аясында сарапшылар цифрлық шабуылдардың өзекті түрлерін қарастырып, кең таралған алаяқтық схемаларын талдап, цифрлық құрылғылар мен онлайн-сервистерді пайдалану кезіндегі тәуекелдерді азайтуға көмектесетін практикалық ұсыныстарымен бөлісті.
Цифрлық сауаттылықтан корпоративтік қауіпсіздікке дейін
Гүлдана Жұматай, MSSP.GLOBAL компаниясының Citizensec.kz жобасының жетекшісі, «Жұмыс орнындағы цифрлық сауаттылық: әлеуметтік жауапкершіліктен корпоративтік қауіпсіздікке дейін» тақырыбында баяндама жасады.
Баяндамада ақпараттық қауіпсіздікті қамтамасыз етудегі адамның рөліне ерекше назар аударылды. Сарапшы фишинг, әлеуметтік инженерия, зиянды бағдарламалық жасақтама және есептік жазбаларды ұрлау сияқты кибершабуылдардың негізгі түрлері туралы айтып берді. Сондай-ақ қызметкерлердің әрекеттері ұйымдардың қауіпсіздігіне қалай әсер ететіні және ақпараттық қауіпсіздік ережелерін сақтаудың жұмыс мәдениетінің бір бөлігіне айналуы неліктен маңызды екені түсіндірілді.
«Ақпараттық қауіпсіздік тек технологияларға ғана емес, адамдардың өз әрекеттеріне де байланысты. Қарапайым қателіктің өзі — күмәнді сілтемеге өту, әртүрлі сервистерде бір құпиясөзді пайдалану немесе құпия ақпаратты беру — елеулі қауіп тудыруы мүмкін. Сондықтан цифрлық сауаттылық әр адамның күнделікті өмірі мен әр ұйымның жұмыс мәдениетінің бір бөлігіне айналуы керек», — деп атап өтті Гүлдана Жұматай.
Телефон алаяқтығы: қауіпті қалай тануға болады?
Асет Ордабаев, Kaspersky компаниясының Қазақстан, Орталық Азия және Моңғолия бойынша мемлекеттік органдармен жұмыс жөніндегі басшысы, «Телефон алаяқтарынан қалай қорғануға болады?» тақырыбында сөз сөйледі.
Қатысушылар алаяқтардың ашық дереккөздердегі ақпаратты қалай пайдаланатынын, ұйымдардың телефон нөмірлерін қалай қолдан жасауды және өздерін банк немесе құқық қорғау органдарының қызметкерлері ретінде қалай таныстыратынын білді. Баяндама барысында дауыстық және SMS-фишинг схемалары, сондай-ақ адамның бойында қорқыныш туғызып, асығыс шешім қабылдауға итермелейтін психологиялық тәсілдер қарастырылды.
«Телефон алаяқтығының схемалары барған сайын күрделеніп келеді, ал қаскөйлер ашық дереккөздерден табуға болатын ақпаратты белсенді түрде пайдалануда. Олар адамды қорқытып, шұғыл әрекет етуге мәжбүрлеу үшін үрей мен асығыстық сезімін тудыруға тырысады. Мұндай жағдайда кідіріп, құпия деректерді хабарламау және ақпаратты ресми байланыс арналары арқылы өз бетінше тексеру маңызды», — деп атап өтті Асет Ордабаев.
Сарапшы күтпеген қоңырауларға сын көзбен қараудың, растау кодтарын ешкімге бермеудің және қаржылық операцияларға қатысты кез келген ақпаратты ресми байланыс арналары арқылы тексерудің маңызын да атап өтті.
Фото: Сапалы Қазақстан
Цифрлық гигиена күнделікті әдеттерден басталады
Айдын Ходжамьяров, Кибершабуылдарды талдау және тергеу орталығының (ЦАРКА) Red Team бағытының жоба менеджері, «Цифрлық гигиена. Цифрлық сауаттылықты арттыру және деректерді қорғау» тақырыбында баяндама жасады.
Баяндама жеке ақпаратты қорғаудың негізгі қағидалары мен цифрлық құрылғыларды қауіпсіз пайдалануға арналды. Сарапшы бірегей әрі сенімді құпиясөздерді, құпиясөз менеджерлерін, екі факторлы аутентификацияны пайдаланудың, веб-сайттардың түпнұсқалығын тексерудің және әлеуметтік желілердегі құпиялық баптауларын реттеудің маңызы туралы айтты.
Сондай-ақ смартфондар мен компьютерлерді қауіпсіз пайдалану, қосымшаларды ресми дереккөздерден орнату, бағдарламалық жасақтаманы уақтылы жаңарту және маңызды деректердің резервтік көшірмелерін жасау мәселелеріне ерекше назар аударылды.
«Цифрлық гигиена күнделікті әдеттерден басталады. Бірегей әрі күрделі құпиясөздер, екі факторлы аутентификация, қосымшаларды қауіпсіз пайдалану және сілтемелерге мұқият қарау жеке деректердің таралып кету қаупін азайтуға көмектеседі. Қауіпсіз цифрлық ортада дұрыс әрекет ету дағдыларын алдын ала қалыптастыру маңызды, оқиға болғанша күтудің қажеті жоқ», — деп атап өтті Айдын Ходжамьяров.
Цифрлық қауіпсіздік мәдениетін қалыптастыру
Іс-шара жеке және корпоративтік киберқауіпсіздік мәселелерін біріктіріп, ақпаратты қорғау тек технологияларға ғана емес, пайдаланушылардың білімі мен мінез-құлқына да байланысты екенін көрсетті.
Сарапшылар ұсынған практикалық кеңестер қатысушыларға жеке деректерге мұқият қарауға, күмәнді хабарламалар мен қоңырауларды тануға, цифрлық сервистерді қауіпсіз пайдалануға және кәсіби ортада кибергигиенаның негізгі қағидаларын қолдануға көмектеседі.
Almaty Hub Алматы қаласының әкімдігімен бірлесіп, цифрлық сауаттылықты арттыруға және заманауи киберқауіптер туралы хабардарлықты күшейтуге бағытталған бастамаларды қолдайды. Мұндай іс-шаралар ақпараттық қауіпсіздік жөніндегі практикалық білімді таратуға және цифрлық технологияларды жауапкершілікпен пайдалану мәдениетін қалыптастыруға ықпал етеді.
Аккредиттеу және қосымша ақпарат алу мәселелері бойынша:
Ирина +7 777 193 3233
