АҚШ президенті Дональд Трамптың Ормуз бұғазын қоршауға алу туралы мәлімдемесінен кейін әлемде мұнай бағасы өсіп жатыр. Brent маркалы мұнайдың құны қайтадан барреліне 100 доллардан асты. Бұл туралы "Сапалы Қазақстан" порталы kaz.tengrinews.kz сайтына сілтеме жасап хабарлайды.
Лондонның ICE биржасында Brent маркалы мұнайдың маусымдық фьючерстерінің құны 7,27 пайызға өсіп, барреліне 102 доллардан асты, бұған Астана уақыты бойынша сағат 08:00-дегі сауда-саттық деректері дәлел.
WTI маркалы мұнайдың көктемгі фьючерстерінің құны 8,55 пайызға өсіп, барреліне 104,83 долларды құрады.
АҚШ пен Иран келіссөздері
Еске сала кетейік, сенбі күні, 11 сәуірде Иран мен АҚШ Исламабадта келіссөздерді бастаған болатын. Алайда жексенбі күні таңертең АҚШ вице-президенті Джей Ди Вэнс уағдаластыққа қол жеткізу мүмкін болмағанын хабарлады. Келіссөздер ұзаққа созылғанымен, нәтижесіз аяқталып, америкалық делегация еліне қайтқан.
Сол күні сәл кейінірек Трамп АҚШ Ормуз бұғазы арқылы өтпек болған барлық кемелерді бұғаттауды бастайтынын мәлімдеді. Ол сондай-ақ АҚШ Әскери-теңіз күштеріне мұндай кемелерді бақылауды және өту үшін Иранға ақы төлегендерін ұстауды тапсырды.
Қазақстандағы мұнай бағасының өсуі: бюджет үшін тиімді, бірақ экономика үшін қауіпті
Бұған дейін мұнай-газ саласының сарапшысы Асқар Исмаилов мұнай бағасының өсуі Қазақстан бюджетіне қосымша табыс әкелетінін, Ұлттық қорды нығайтып, сауда балансын жақсартатынын және теңге бағамын қолдайтынын атап өткен болатын.
Дегенмен мұнай нарығындағы жоғары құбылмалылық экономикаға қауіп төндіреді. Бағаның ауытқуы инфляцияға, инвестицияларға және қаржы нарықтарына әсер етуі мүмкін. Экономиканың мұнай табысына тәуелділігі Қазақстанды сыртқы соққылар мен әлемдік бағаның күрт өзгеруіне сезімтал етеді.
2026–2028 жылдарға арналған бюджетте мұнай бағасы барреліне 60 доллар, ал доллар бағамы 540 теңге деңгейінде бекітілген. Бұл көрсеткіштер экспорттан түсетін табысты, әлеуметтік төлемдерді және бюджеттік бағдарламалардың шығыстарын есептеу үшін қолданылады.