Қазақстанда қызметкерлерге смартфон арқылы еңбек шарттарын есепке алудың бірыңғай жүйесінде тіркелген еңбек шарттары туралы мәлімет алуға мүмкіндік беретін Enbek HR мобильді қосымшасы іске қосылды.

Ол еңбек ресурстары порталымен толық синхрондалған.

"Қызметкерлер Enbek HR мобильді қосымшасында жеке кабинетте өздерінің еңбек шартын көре алады, жұмыс орнынан анықтама және жеке ісінен ақпарат жүктей алады – фото, жеке куәлік, паспорт деректері, білімі, еңбек қызметі туралы мәліметтер, 075/Е медициналық анықтама, психо/нарко/туб. диспансерлердегі есеп мәліметтері және тағы басқалар", - деп хабарлайды еңбек және халықты әлеуметтік қорғау министрлігі.

Сондай-ақ жұмысшы қосымша арқылы немесе порталдағы жеке кабинетте жұмыс берушіге электронды жеке ісі үшін қажет дербес деректерге қол жеткізуге келісімін бере алады.

Еңбек шарты бойынша ескі мәліметтер анықталған жағдайда, қызметкер еңбек шартының деректерін өзгертуге, еңбек шартын бұзу туралы ақпарат енгізуге немесе алып тастауға сұрау салуға мүмкіндігі бар.

Қосымшаның қызметтерін пайдалану үшін мобильді азаматтар базасында тіркелген телефон нөмірі болуы қажет. Егер қызметкер бұрын порталда тіркелген болса, онда мобильді қосымшада қайта тіркеу талап етілмейді – авторизация порталға кіретін логин және парольмен жүзеге асырылады.

"Enbek HR қосымшасы мен hr.enbek.kz порталы – Электронды еңбек биржасының цифрлық жұмыспен қамту экожүйесінің бөлігі. Бұл экожүйе азаматтарды кәсіби жолында мамандық таңдаудан бастап еңбек қатынастарын рәсімдеуге дейін сүйемелдейді. Бір есептік жазбасы бар азамат порталда немесе Enbek.kz қосымшасында жұмыс таба алады немесе мемлекеттік қызметтер мен жұмыспен қамту шараларын ала алады, Skills.Enbek.kz онлайн-оқыту платформасында жаңа дағдыларды үйренеді, Business.Enbek.kz порталында бизнес ашуға мемлекеттік грант ала алады", - деп түсіндірді министрлік.

Мобильді қосымшаны PlayMarket және AppStore-дан тегін жүктеуге болады.

Қазақпарат