Астанадағы психикалық денсаулық орталығының дәрігері, психиатр-нарколог Анар Тастембекова насыбай адам өміріне қандай қауіп төндіретінін айтып берді.

Насыбайдың негізгі белсенді ингредиенті - темекі (табак). Сондықтан адам алдымен никотинге тәуелді бола бастайды. Сондай-ақ, насыбайдың құрамында темекі шаңы, сілті (сөндірілген әк), өсімдік күлі, өсімдік майы, тауық немесе түйе көңі, марихуана және басқа да ингредиенттер бар.

Дәрігердің айтуынша, темекіден адамның өкпесі қатты зардап шексе, насыбай асқазан-ішек жолдары мен ауыз қуысының шырышты қабығына кері әсер етеді.

"Насыбайды қолданудың басында асқазан-ішек жолынан ас қорыту жүйесінің бұзылуы және диарея пайда болады, ол көп ұзамай созылмалы түрге ауысады. Қоспаның құрамында түйе көңі немесе тауық көңі жиі кездесетіндіктен, көбінесе ішек инфекциялары жиналады немесе паразиттер жұғады. Мұндай жағдайларда көбінесе вирустық гепатиттер дамиды", - деді Тастембекова елорданың коммуникациялар қызметінде өткен брифингте.

Ал насыбайды ұзақ уақыт қолданған жағдайда тіл, ерін, көмей ісігі, тістің бұзылуы, психиканың бұзылуы, ішкі ағзалардың аурулары және бедеулік сияқты ауыр зардаптар болады.

 ҚазАқпарат