Тағы бір қазақстандық жоғары оқу орны – Алдамжар атындағы Қостанай әлеуметтік-техникалық университеті жабылуда, деп хабарлайды ҚР білім және ғылым министрлігінің баспасөз қызметі.

       Бұған дейін ҚР білім және ғылым министрлігінің білім және ғылым сапасын қамтамасыз ету комитетіне университет ұжымынан арыз-шағымдар келіп түскен.

       Бұл университетті жоспардан тыс тексеруге себеп болған. Нәтижесінде комиссия енгізілген 46 тексеру парағының 35 тармағында заң бұзушылықтарды анықтады.

       "Біздің басты міндетіміз – еліміздегі білім мен кадрлар даярлаудың сапасын арттыру. Егер бүгін университеттер қажетті талаптарға сай болмаса, ертең білімі мен біліктілігі жұмыс берушілердің сұранысына сай келмейтін мамандарды қабылдаймыз. Әрине, сапалы білім беруді емес, тек пайда табуды бірінші орынға қоятындар үшін тексерулер мен лицензияларды қайтарып алу көп қолданылмайтын шара. Сонымен қатар, министрлік бірінші тексеруден кейін университет басшылығына заң бұзушылықтарды жоюға уақыт береді, бірақ көбінесе олар уақытын сот істеріне жұмсайды. Әрине, бұл университеттің жабылуын айтарлықтай кешіктіріп, студенттерден төлемақы түрінде табыс алуға мүмкіндік береді", - деді білім және ғылым министрлігі білім және ғылым сапасын қамтамасыз ету комитеті төрағасының орынбасары.

       Ол университет қызметіне қатысты шағымдар 2020 жылдан бастап түсе бастағанын атап өтті. Тексеру нәтижелеріне университет шағым түсірді, алайда бірінші және екінші инстанция соттарының шешімдерімен Комитеттің тексеру нәтижелері бойынша барлық әкімшілік актілері өзгеріссіз қалдырылды, университеттің шағымдары қанағаттандырылмады. Енді оны Жоғарғы сот шешеді.

       Комитеттің шешімімен университет бас лицензиясынан айырылған. Бұл шешімге университет тарапынан да сотқа шағым түсті. Бұған дейін сот шешімімен үш қазақстандық университет, Орталық Азия университеті, Ақтау гуманитарлық-техникалық университеті және Астана университеті, жабылған болатын.