Мемлекет

Бөлісу

Пандемия кезінде ана өлімі 3-4 есе көбейген

Пандемия кезінде ана өлімі 3-4 есе көбейген

Биылғы жылдың алғашқы тоқсанында елімізде ана мен бала өлімі күрт азайған. Денсаулық сақтау министрі Ажар Ғиният мұны коронавирус инфекциясының екпіні қайтқанымен байланыстырып отыр.

 «Коронавирус инфекциясынан жүкті әйелдер көз жұмған. Өйткені жүкті әйелдерде коронавирус ауыр өтті. Олардың физиологиялық жағдайы да аурудың кең таралып, жылдам асқынуына себеп болғанын түсініп отырсыздар», - деді Ажар Ғиният Сенат отырысынан БАҚ өкілдеріне берген сұхбатында.

Пандемия кезінде ана өлімі әлем бойынша 3-4 есе артқан. Дүниежүзілік денсаулық сақтау ұйымының дерегін келтірген министр пандемияға дейін ана өлімі өте аз тіркелетін елдердің өзінде бұл көрсеткіш 3-4 есе өскенін атады. Яғни, жалпы әлемде ана өлімінің артуы коронавируспен байланысты.

Бұл вирус болғандықтан баласың ба, жассың ба, кәрісің бе, жүкті анасың ба – қарамады. Жап-жас, дені сау адамдар да көз жұмып жатты. Ал жүкті әйелдердің физиологиялық жағдайы инфекцияның тез дамуына ықпал етіп, қайғылы жағдайлардың көбеюіне себепші болды. Дүниежүзілік денсаулық сақтау ұйымы жүргізген барлық талдау әлемде, соның ішінде Қазақстанда да бұл көрсеткіш былтыр өскенін көрсетеді. Қаңтар айында коронавирус инфекциясының бесінші толқыны болғанына қарамастан, бірінші тоқсанда бұл көрсеткіш күрт төмендеді. Ана өлімінің өсуі коронавирус инфекциясымен байланысты, - деді министр.

Бірінші тоқсанда Атырау, Павлодар сияқты ана өлімінің көрсеткіші жоғары облыстарда қайғылы жайттар тіркелді. Жалпы бұл қайғылы оқиғалар босандыруға қажет жаңа немесе қымбат техниканың болмауымен байланысты емес. Өлімнің негізгі себептерінің бірі халықтың денсаулығына және перинаталдық орталықтарда немесе перзентханаларда уақтылы көмек алуға немқұрайлы қарайтынымен байланысты, деп хабарлады ҚазАқпарат.

Жыл сайын мақсатты трансферттер арқылы, республикалық бюджет арқылы әрбір өңірге белгілі бір ақша бөлінеді. Биыл медициналық жабдықтарды сатып алуға 50 млрд теңге жоспарланған. Оның ішінде Денсаулықсақтау министрлігі босанатын әйелдерге және балалар ұйымдарына басымдық береді. Соңғы екі жылда перзентханалар мен перинаталдық орталықтардың жабдықталуы 80-90%-ға жеткен.

Өңірлер бұл бағытта жұмыс істеп жатыр. Бірақ техниканың аты – техника. Тәулігіне 24 сағат жұмыс істейтін аппараттар, ультрадыбыстық зерттеу аппараттары жыл сайын жаңартуды қажет етеді - деді министр.

Фотосурет  avesta-news.kz, news.myseldon.com сайттарынан алынды

Біздің әлеуметтік желілерге жазылыңыздар және барлық оқиғалардан хабардар болыңыз!
Facebook Youtube Instagram Вконтакте Форум качества

Пікірлер

Комментарий қалдыру үшін порталға тіркеліңіз немесе кіріңіз

Авторизация через