Бүкіл Ташкент көрінетін мейрамхана, люкс пәтерлері мен тұрғындарға арналған 33 қоғамдық аумақтан тұратын Өзбекстандағы ең биік зәулім ғимарат Nest One қонақтар үшін есігін айқара ашты. Standard.kz порталы бұл туралы  Kazinform сайтына сілтеме жасап хабарлайды. 

Nest One кешені жеке экожүйе ретінде жобаланған және премиум-класс пәтерлерін, кеңселерді және қаланың керемет көрінісі бар 33 қоғамдық аумақты қамтиды: дүкендер, мейрамханалар, балалар ойын алаңдары, қысқы бақ, демалыс және спорт алаңдары.

Өзбекстандағы бірінші зәулім ғимараттың биіктігі 267 метр және елуден астам қабаты бар. Ғимарат құрылысына 27 000 тонна темір, 150 000 тонна бетон жұмсалған. Ғимарат мыңнан астам адамның еңбегімен аяқталды.

Фото: Nest One

Зәулім ғимараттың құрылысы 2019 жылы басталған. Ол алғаш рет қолданылған көптеген инновациялық тұжырымдамаларды біріктіреді және күрделі инженерлік есептеуге негізделген. Ғимаратта ең соңғы әлемдік технологиялар пайдаланылған және бүгінгі таңда әлемдегі ең қауіпсіз зәулім ғимараттардың бірі болып саналады. Өрт қауіпсіздігі барлық халықаралық стандарттарды ескере отырып жасалған.

Nest One – Өзбекстандағы алғашқы зәулім ғимарат елдегі ең биік тұрғын үй болды. All Inclusive қызметтері тұжырымдамасы бойынша салынған ғимаратта барлығы 1029 пәтер және 29 жоғары жылдамдықта тасымалдайтын лифт бар. 20 VIP пәтер бұлт астында, 41-50-ші қабаттардың арасында орналасқан. Люкс апартаменттердің көпшілігі қазірдің өзінде сатып алынған.