Қазақстандық оқушылар арасында кең таралған аурулардың бірі – сколиоз. Баланың омыртқасының қисаюына өте ауыр рюкзак әсер етеді деген кең тараған пікір бар. Бұл қаншалықты рас? Баланың арқасы қисайып кетпеу үшін не істеу керек? Бұл сұрақтарға педиатр Бақытгүл Мурзабекова жауап берді.

Сколиоз - бұл омыртқаның бұзылуы, егер уақытылы сақтық шаралары қолданылмаса, ол сіздің балаңыздың денсаулығына жағымсыз әсер етуі мүмкін. Педиатр Бақытгүл Мурзабекова балаңызда сколиоздың дамуын болдырмауға көмектесетін кеңестермен бөлісті.

Жүйелі түрдегі физикалық белсенділік

Физикалық белсенділік арқаны сау ұстауда шешуші рөл атқарады. Балаңызды спортпен, жүзумен, йогамен немесе басқа физикалық жаттығулармен айналысуға шақырыңыз. Бұл арқа бұлшықеттерін нығайтуға және арқаны дұрыс қалыпта ұстауға көмектеседі.

Эргономикалық мектеп сөмкесі

Дизайны дұрыс және арқаға сәйкес келетін рюкзак омыртқаға түсетін жүктемені азайтады. Салмақ біркелкі түсуі үшін рюкзакта қатты және реттелетін белдіктер бар екеніне көз жеткізіңіз. Рюкзактың салмағын үнемі тексеріп отырыңыз, ол балаңыздың салмағының 10-15 пайызынан аспауы керек.

Дұрыс қалып

Балаңызға дұрыс қалыпта отыруды және тұруды үйретіңіз. Ол үшін мына ережелерді сақтау керек:

Арқасы түзу, ал иықтары босаңсыған болуы керек;
Отырған кезде аяқтары еденге тегіс тиіп тұруы керек, ал тізелері тік бұрышта бүгілген болуы тиіс;
Салмақты көтеру кезінде (рюкзакты) бала арқасын емес, аяғын пайдалануы керек.

Дәрігерге тексеріліп тұру

Дәрігерге тексеріліп тұру, соның ішінде ортопедиялық тексеруден өту сколиозды ерте стадиясында анықтауға көмектеседі. Ол неғұрлым ерте анықталса, оны емдеу соғұрлым оңай болады.

Экран алдындағы уақытты шектеу

Компьтердің немесе ұялы телефонның алдында ұзақ отыру омыртқаға күш түсуіне және арқаның қисаюына әкелуі мүмкін. Экран уақытына шектеу қойыңыз және үзілістер кезінде баланың созылуын қадағалаңыз.

Дұрыс тамақтану

Дұрыс тамақтану сүйектер мен бұлшықеттерді нығайтуға көмектеседі. Балаңызға сүйектің сау дамуы үшін қажет кальций мен D дәрумені бар тағамдар беріңіз. Балада артық салмақ болмауы керек, себебі бұл омыртқаға түсетін күшті арттыруы мүмкін. Дұрыс тамақтану мен тұрақты физикалық белсенділікті сақтаңыз.

Сонымен қатар, педиатр қазіргі ғылымға сәйкес мектеп рюкзактары, тіпті, ауыр болса да, сколиозға себеп бола алмайтынын атап өтті. Дегенмен, салмақ нормаларын ұстанған жөн, өйткені тым көп ауыр сөмке арқа мен белдің ауырсынуын тудырады, бұл өз кезегінде ауыр салдарларға әкелуі мүмкін.

Дереккөз massaget.kz.