Ауыл шаруашылығы министрі Ербол Қарашөкеев Үкімет кулуарында киіктен келген зиянға шағым айтып жүрген шаруаларға өтемақы төлеу жөнінде пікір білдірді.

       «Заңнамалық база болмаса, ешқандай көмек бере алмаймыз. Қазір нормативтік-құқықтық база әзірленіп жатыр. Экология және табиғи ресрурстар министрлігімен ақылдасып, жауапкершілікті бөліп реттемекшіміз», - деді министр.

       Сондай-ақ, ол заңнамаға түзету енгізілмесе, шаруаларға киіктен қомақты шығын келгеннің өзінде өтеу мүмкін еместігін атап өтті.

       «Нормативтік-құқықтық база болмаса, әзірге ешқандай төлем жасалмайды. Қазір осыған заңнама деңгейінде негіз түзіп жатырмыз», - деді Ербол Қарашөкеев.

       ҚазАқпарат