Биылғы 1 қаңтардан бастап балаға төлқұжат дайындау үшін төленетін мемлекеттік баж мөлшері өзгерді. Егер бұрын балалар төлқұжатының құны 8 АЕК-ті құраса, қазір екі есе аз төлейді. Енді оны дайындау үшін ата-аналар 4 АЕК немесе 14 768 теңге төлейді.

«Қазақстандықтар жеке куәлікті 16 жастан бастап алатын болса, төлқұжатты кез келген жаста алуға болады. Бұл құжатты рәсімдеу үшін міндетті түрде ХҚКО-ға жүгіну қажет. Баланың төлқұжатын рәсімдеу кезінде оның туу туралы куәлігін, ата-анасының бірінің жеке куәлігін және баж салығын төлеу туралы түбіртекті ұсыну керек», - деп түсіндірді «Азаматтарға арналған үкіметтің» Шымкент қаласы бойынша филиалының PR-менеджері Алтынай Татаева.

Бұл ретте қызметке өтініш білдіру үшін баланың ата-анасының бірі келуі міндетті. Қызмет көрсетудің стандартты мерзімі – 15 жұмыс күні. Алайда, қосымша төлем жасау арқылы бұл процесті жеделдетуге болады. Азаматтар бұл процесті осы әдіс бойынша үш күннен бір жұмыс күніне дейін қысқарта алады.

Дереккөз kaz.inform.kz.