Оқушылардың мектепте түскі ас ішуіне берілетін уақытты ұзарту керек. Алматылық ата-аналар осындай бастама көтерді.
Тұрғындардың пікірінше, қазіргі 10-15 минут үзіліс аздық етеді. Бұған Білім басқармасы қандай уәж айтады?
Алматылық нутрициолог Альмира Орлованың сөзінше, балаларға ауқаттануға берілетін уақыт тым қысқа. Үзілістің аздығынан оқушылар шала тамқтанады немесе асығып жейді. Салдарынан бүлдіршіндердің денсаулығына зиян келеді. «Білімге зейіні де ашылмайды», - дейді ол. Сондықтан бірқатар ата-ана бұл уақытты 30 минуттан 1 сағатқа дейін созуды ұсынып отыр.
Ал жауапты мамандардың сөзінше, тамақтануға бөлінген уақыт жеткілікті. Түскі астың кестелері мен уақыты да заңды талаптарға сай. Оның үстіне, қазіргі кезде қосымша уақыт қосу мүмкін емес. Себебі бала санының көптігіне байланысты кейбір мектептер екі аусымда білім береді.
Мектептегі тамақтың сапасы да қатаң бақылауда. Білім ошақтарында құрылған комиссия бүлдіршіндерге берілетін тамақтың сапасын күнделікті тексереді. Егер дайын астан ақау табылса, бірден алып тасталынады. Ал қызмет көрсететін кәсіпкерге тиісті органдар бірден шара қолданады.
Мектеп асханаларында орнатылған камералар арқылы оқушының асханаға келіп тамақтануы мен уақыты тіркеледі. «Түскі асын тауысып үлгермеген балаларға қосымша уақыт беріледі», - дейді мамандар.
https://24.kz/kz/
