Алматыда 2026 жылдың басынан бері мамандар экологиялық нормаларға сәйкестігін анықтау үшін 116 мыңнан астам автокөлікті тексерді.
Нәтижесінде пайдаланылған газдың уыттылығы мен түтіндеу деңгейі рұқсат етілген нормадан асқан 13 мыңнан астам көлік құралы анықталды, деп хабарлайды Tengri Auto.
Қалалық әкімдіктің мәліметінше, бақылау жұмыстары Алматыға кіреберіс негізгі жолдарда орналасқан 19 стационарлық экологиялық бекетте жүргізіліп жатыр. Бірінші жартыжылдықта мамандар 116 мыңнан астам өлшеу жұмыстарын жүргізді.
Тексеру қорытындысы бойынша ластаушы заттардың мөлшері мен түтіндеу деңгейі нормативтен асқан 13 092 жағдай тіркелді. Алматы Полиция департаментінің деректеріне сәйкес, 2026 жылдың бірінші жартысында осы бұзушылықтар үшін жалпы сомасы 391 719 190 теңге әкімшілік айыппұл салынған.
Бұдан бөлек, сәуірден маусымға дейін Eco Almaty ЖШС Полиция департаментімен және Экология департаментімен бірлесіп, жылжымалы экологиялық зертханаларды қолдана отырып рейдтер өткізді.
Осы уақыт ішінде 2 836 автокөлік тексерілді. Олардың 714-інен экологиялық нормалардың бұзылуы анықталды. Оның ішінде:
- бензин қозғалтқышымен - 266;
- дизельді қозғалтқышпен - 446;
- газ қозғалтқышымен - 2.
Сонымен қатар мамандар Алматының автобус парктерін қайта тексерді. 1 сәуір мен 30 маусым аралығында 2 591 автобус тексеруден өтті. Экологиялық нормативтердің асып кетуі 509 автобуста анықталды, оның ішінде:
- 97-сі дизельді қозғалтқышпен;
- 412-сі газ қозғалтқышымен.
Еске сала кетейік, биыл Алматыда LEZ (төмен қалдықты аймақтар) пилоттық кезеңі іске қосылды. Ол 28 сәуірде басталып, 2026 жылдың 31 желтоқсанына дейін жалғасады. Бұл кезеңде LEZ аймағында жүргізушілердің қозғалысына шектеу қойылмайды, сондай-ақ ақы алынбайды немесе айыппұл салынбайды.
Жүргізушілер үшін маңызды мәліметтер
Әкімдік жоба бойынша жұмыстар әлі де жалғасып жатқанын хабарлады. Нақты шекаралары келісілгеннен кейін жарияланады деп уәде етілді.
LEZ аймағындағы заң бұзушылықтарды "Сергек" бейнебақылау жүйесі арқылы тіркеу жоспарланған. Экологиялық класы төмен автокөлік иелеріне көліктің техникалық жағдайын мұқият қадағалау ұсынылады. Бұл ретте пилоттық кезеңде қандай да бір шектеулер енгізу жоспарда жоқ.
https://kaz.tengrinews.kz/tengriauto/