Әлем елдері цифрлық технологияларды мемлекеттік қызмет саласына белсенді енгізіп келеді. Соның айқын дәлелінің бірі — Біріккен Араб Әмірліктеріндегі жаңа бастама. Енді Дубай көшелерінде қоғамдық қауіпсіздікті бақылауға жасанды интеллектпен басқарылатын пилотсыз патрульдік көліктер тартылып жатыр.
Бұл жоба заманауи технологияны құқық қорғау жүйесімен ұштастыруға бағытталған. Арнайы интеллектуалды жүйемен жабдықталған көліктер көшелердегі тәртіпті тәулік бойы бақылап, күмәнді әрекеттерді автоматты түрде анықтай алады. Сонымен қатар жол қозғалысы ережелерінің бұзылуын тіркеп, барлық ақпаратты орталық басқару базасына жедел түрде жібереді.
Мамандардың айтуынша, пилотсыз патрульдік көліктер адам күші жетпейтін немесе үздіксіз бақылау қажет аумақтарда өте тиімді. Жасанды интеллект жүйесі камералар мен сенсорлар арқылы айналаны толық бақылап, қауіпті жағдайларды бірден сараптайды. Бұл құқықбұзушылықтың алдын алып қана қоймай, төтенше жағдайларға жедел әрекет етуге мүмкіндік береді.
Жобаның тағы бір ерекшелігі — экологиялық тиімділігі. Көліктер электр қуатымен жұмыс істейтіндіктен, қосымша жанармай шығынын қажет етпейді әрі қоршаған ортаға зияны аз. Сондай-ақ олар тәулік бойы тоқтаусыз қызмет атқара алады.
Алғашқы кезеңде пилотсыз патрульдер туристер жиі баратын аймақтарда сынақтан өткізілген. Қазіргі таңда Дубай полициясы бұл тәжірибені қаланың басқа да ірі аудандарына кезең-кезеңімен енгізіп жатыр. Сарапшылар мұндай технология алдағы уақытта әлемнің өзге мегаполистерінде де кеңінен қолданылуы мүмкін екенін айтады.
Бүгінде жасанды интеллект тек байланыс немесе өндіріс саласында ғана емес, қоғамдық қауіпсіздік жүйесінде де маңызды құралға айналып келеді. Бұл — цифрлық дәуірдегі қауіпсіздік қызметінің жаңа форматы деуге болады.