1-сыныпқа құжат тапсыру тәртібі қандай?

Бүгін таңғы 09:00-ден бастап республика бойынша 1-сыныпқа құжат қабылдау басталады. Бұл туралы "Сапалы Қазақстан" порталы qazaqstan.tv сайтына сілтеме жасап хабарлайды. 

Білім және жоғары ғылым министрлігі биыл 370 мыңнан астам оқушы мектеп табалдырығын аттайды деп болжап отыр. Ведомтсвоның ақпаратына сенсек, білім беру мекемелерінде орын тапшылығы болмауы тиіс. Құжатты қалай, қайда тапсырамыз? 

1-сыныпқа баратын балалардың құжаты 1 сәуірден бастап 31 тамызға дейін қабылданады. Мектепке алты жасар балалар мен жыл соңына дейін 6 жасқа толатын бүлдіршіндерді қабылдауға рұқсат. Қандай құжаттар қажет?
- ата-ананың немесе заңды өкілінің өтініші;
- денсаулық жағдайы туралы анықтамасы;
- баланың денсаулық паспорты;
- Сондай-ақ 3х4 өлшемді 2 сурет.

Білім беру ұйымдары осы тізімнен тыс өзге құжаттарды тапсыруды талап етуге құқығы жоқ. Құжат өткізудің бірнеше жолы қарастырылған.

Бірінші, электрондық үкіметтің еgov.kz порталы арқылы жүзеге асады. Ең алдымен электронды цифрлық қолтаңба кілтін (ЭЦҚ) алыңыз. Содан соң «БІЛІМ» бөліміне кіріп, «ОРТА БІЛІМДІ» таңдайсыз. Оның ішінде «1-СЫНЫПҚА ҚҰЖАТТАРДЫ ҚАБЫЛДАУ» тетігін басып, «ОНЛАЙН СҰРАУ» парағына өтіңіз. Өтінішті толтырып, жоғарыда атап көрсеткен құжаттар легін тіркейсіз.

Өтініш 1 жұмыс күні ішінде қаралады.

Екінші нұсқа - тікелей мектепке барып, құжаттардың көшірмесін өткізу. Яғни дүйсенбіден жұмаға дейін жұмыс уақытында өтініш қалдыра аласыз.

Ата-ананың өзінің тіркеуі қай жерде болады, бала да сол арқылы тіркеледі. Бізде мынадай қағида бар: 3/1 деген. 3 бала өз ауданынан тіркеле алады және 1 бала сырттан. Басқа мекенжайда тұрса да, ұнатқан мектебіне барып тіркеле алады, - дейді Гүлназ Есжанова, ҚР ҒЖБМ Орта білім беру комитетінің бас сарапшысы:

Елімізде жұмыс бабымен яки уақытша тұрақтаған шетелдіктер мен қандастар үшін де құжат тапсыру талабы бірдей. Тек баланың туу туралы куәлігі мен заңды өкілінің жеке куәлігін қоса тіркеу қажет. Сондай-ақ елде тұруға рұқсат ыхтиярхаты мен көші-қон картасы қатар тапсырылады. Ал баланың денсаулық паспортын өткізу міндеттелмейді.

Ережеге сәйкес, балаларды конкурстық негізде қабылдау мен білім деңгейіне сай сыныптарға бөлуге тыйым салынған. Құжатты ерте тапсырғаныңызбен, балаңыздың 1-сыныпқа қабылданғаны туралы бұйрық 25 тамыздан кейін жарияланады. Десе де, сала мамандары ертерек қамданып, білім беру ұйымын тиянақты таңдауға кеңес береді.