Смартфондарды тіркеудің жаңа ережесі қабылданды

Жаңа ереже азаматтарға заңды әрі сапалы құрылғыларды сенімді сатып алуға мүмкіндік береді. Сонымен қатар, бизнес үшін ашық әрі әділ бәсекелестік жағдайлары жасалып, нарықтың дамуына оң әсер етеді. Бұл туралы  Цифрлық даму, инновациялар және аэроғарыш өнеркәсібі министрлігінің баспасөз қызметі таратқан ақпаратта жазылған. 

Мемлекет заңсыз телефондардың айналымын азайтып, импортты бақылауды күшейту арқылы алаяқтық деңгейін төмендетуді жоспарлап отыр. 

- Жаңа ережелер ұялы телефондарды заңсыз әкелуге және көлеңкелі нарықтың үлесін азайтуға бағытталған. Негізгі мақсат – тұтынушылардың құқығын қорғау, байланыс құрылғыларының қауіпсіздігін арттыру және алаяқтықпен күресу, - делінген министрліктің Kazinform агенттігіне берген жауабында.

Сонымен қатар Цифрлық даму министрлігі «бұл шешім елімізде смартфондардың күрт қымбаттауына әкелмей ме?» деген сұраққа жауап берді.

- Бағаға келетін болсақ, енгізілген жаңа ережелер, жоғарыда атап өткендей, Қазақстан аумағына кіретін абоненттік құрылғылардың заңсыз әкелінуі мен таралуына қарсы күресуге бағытталған. Бұл абонеттік құрылғылардың қымбаттауына әсер ететін фактор саналмайды, - деп жауап берді ведомство.

Еске салсақ, 2025 жылғы 24 наурыздан бастап абоненттік ұялы байланыс құрылғыларын тіркеу ережелеріне енгізілген өзгерістер күшіне енеді.

Жаңа ережелер тек аталған мерзімнен кейін елге әкелінген жаңа құрылғыларға ғана қатысты.

Материал kaz.inform.kz сайтынан алынды.