Орталық Азиядан Қызылорда облысына секундына 500 текше метр су келіп жатыр

Орталық Азия елдерінен Қызылорда облысына Сырдария өзені арқылы секундына 500 текше метрге жуық су келіп жатыр, деп хабарлады Су ресурстары және ирригация министрлігі.

Сырдария өзені арқылы Шардара су қоймасынан Қызылорда облысына секундына 500 текше метрге жуық су жіберіліп жатыр. Министрліктің айтуынша, бұл Азия елдерімен белсенді ынтымақтастықтың арқасында болған шара.

"Қыс мезгілінде оңтүстік өңірлердің қоймалары су жинау режимінде жұмыс істейді. Жиналған су жазда ауылшаруашылық қажеттіліктеріне пайдаланылады", - дейді ведомство.

Министрлік мамандары су алып кету қаупін де тексерген.

Қызылорда қаласындағы КОПЭС саяжайы тұсында Сырдария өзенінің оң жағалауындағы қорғаныс бөгетінің 80 метрлік бөлігін бекіту жұмыстары аяқталды. Бұдан бөлек, "Қос бөгет" қорғаныс бөгетінің зақымдалған 1300 метр бөлігі, "Самит арна" және "Шөмен қайыры" учаскелерінің аралығындағы 3855 метр қорғаныс бөгетінің зақымдалған жерлері қалпына келтіріліп, топырақпен нығайтылды.

Ал Қызылорда су торабы Қызылорда қаласы және Сырдария, Жалағаш, Қармақшы аудандары аумағындағы 120 мың гектар суармалы егістікті және 250 мың гектар шабындық пен жайылымдық жерлерді сумен қамтамасыз етеді.

ҚазАқпарат