Ескі көлік иелері Алматыға кіру үшін ақы төлейді

2024 жылы Алматыда 6 мыңнан астам жол-көлік оқиғасы тіркеліп, 105 адам қаза тауып, 7 мыңнан астам адам жарақат алған, деп хабарлайды "Сапалы Қазақстан" порталы.

Қалалық полиция департаментінің мәліметінше, күн сайын мегаполис көшелерінде бьасқа жақтан келетін көліктерді қосқанда барлығы 1,5 миллионнан астам көлік жүреді.

Жол-көлік оқиғасының жоғары болуының себептерінің бірі – қала жолдарындағы көлік қозғалысының көптігі, мұнда күн сайын қала сыртындағы көліктердің айтарлықтай бөлігі жүреді.

Көліктің көптігі тек жол-көлік оқиғасына себеп болып отырған жоқ. Осындай көлік нөпірі қала ауасын ластап жатыр. Сондықтан Алматы билігі нақты шешімдер қабылдап жатыр. 

Фото: pixabay.com.

Енді ескі темір тұлпар тізгіндегендер Алматыға кіру үшін ақы төлейді. Бұл туралы қала әкімі Ерболат Досаев Медеу ауданы тұрғындарымен кездесуінде айтты. 

qazaqstan.tv сайты жазғандай, жаңа техникалар мен электрлі көлік иелері үшін жол жүру тегін болмақ. Бүгінде алып шаһардың экологиялық ахуалын жақсарту үшін 2025-2027 жылдарға арналған бағдарлама әзірленген. Бұл ең бірінші мегаполисті түтіннен арылтуға, екіншіден аймақтағы кептелісті реттеуге септігін тигізеді, - деді Досаев. 

Жоспар бойынша алғашқы шектеулер келесі жыдың соңына қарай енгізіле бастайды.

Ерболат Досаев, Алматы қаласының әкімі:

Көлік реформасын 2026 жылдың соңына дейін толығымен аяқтау жоспарланған. Шектеулер төлем арқылы болады. Мысалы Алматыда тіркелген көлік заманауи экологиялық талаптарға сай келмесе, көлік иесі қаланың кей аймақтарына кіру үшін ақы төлейді. Біз қазір бұл бағыттағы жұмыстарды жетілдіру үстіндеміз.