Иран және Сингапурмен жасалған келісімдерге қазақстандық бизнес үшін айтарлықтай жеңілдіктер енгізілген

Қазақстан парламенті мәжілісінің депутаттары ЕАЭО-ның Иран және Сингапурмен еркін сауда туралы келісімін ратификациялауды мақұлдады.

Құжат күшіне енгеннен кейін Қазақстаннан Иранға экспортталған бидай (3 млн тоннаға дейін) мен арпа (1,5 млн тонна) кедендік баж салығынан толығымен босатылады.

Иран сондай-ақ ЕАЭО елдерінен келетін жүгері, қарақұмық, ірі қара мал еті, шоколад, күнбағыс майы, болат, тыңайтқыштар мен ауыл шаруашылығы техникасы сияқты тауарлардың шамамен 88%-ына кедендік баж салығын алып тастайды.

ЕАЭО мен Сингапур кедендік баж салығын біртіндеп алып тастайтыны туралы келісті. ЕАЭО бастапқыда тауар номенклатурасының 40%-ы үшін баж салығынсыз режимді қамтамасыз етеді, кейін бұл көрсеткішті 88%-ға дейін арттырады.

2023 жылы Қазақстан мен Сингапур арасындағы тауар айналымы 1,8 миллиард долларды құрады, бұл ретте Сингапурдан Қазақстанға импорт көлемі 81 миллион долларды құрады.

ҚазАқпарат