"Еуразиялық мониторинг" аналитикалық зерттеулер орталығы "Ескі дәуірге жаңа көзқарас: Қазақ даласы мен Ресей империясы статистика призмасы арқылы" атты монографияны таныстырды.

Кітапты Қазақстан мен Ресей тарихшылары бірлесіп шығарды. Авторлары: қазақстандық сарапшылар – тарих ғылымдарының кандидаты Таисия Мармонтова мен "Еуразиялық мониторинг" аналитикалық зерттеулер орталығының басшысы Әлібек Тәжібаев, сондай-ақ ресейлік тараптан – халықаралық білім институты директорының орынбасары Александр Дроговоз. Ал Еуразия ұлттық университетінің профессоры Светлана Ковальская ғылыми редактор болды.

Монография Ресей империясының дәуірін, атап айтқанда, 18 ғасырдан кеңестер уақытына дейінгі аралықты қамтып отыр. Авторлар статистика арқылы дәл сол кезеңде Қазақ даласы мен империяның қарым-қатынасын көрсетуге тырысқан. Сол кездегі әрбір облысқа қатысты нақты мәліметтер – ауданы, халық саны, сауда-саттық көлемі, өнеркәсіп, ауыл шаруашылығы, дін, білім, денсаулық сақтау және тағы басқа статистика бар.

Ғылыми реадактор, профессор Светлана Ковальскаяның айтуынша, монография Қазақстан мен Ресей арасындағы байланыстың тарихын аша түседі, қоғамның көкейінде жүрген сұрақтардың жауабын да табуға болады.

Алдағы уақытта кітапты қазақ тіліне аудару жоспарланып отыр. Қазіргі монографияның кіріспесі мен қорытындысы қазақ тілінде жазылған.

ҚазАқпарат