Бұрынғы Білім (қазір Оқу-ағарту) министрі, парламент депутаты Асхат Аймағамбетов мемлекеттік білім беру гранттарын иелене алмағандарға кеңес берді. Айтуынша елімізде әлі бұл талапкерлерге түрлі грантқа ие болуға мүмкіндік бар. Бұл туралы stan.kz ақпарат агенттігі хабарлайды. Депутат айтуынша көптеген талапкерлерде тегін жоғары білім алу мүмкіндігі бар. 

"Біріншіден, бірнеше мың пайдаланылмаған гранттарды қайта бөлу болады. Бұл гранттар талапкерлерге ҰБТ ұпайларына сәйкес беріледі. Екіншіден, әкімдіктердің гранттары бар. Жергілікті бюджеттен тағы бірнеше мың грант бөлінеді. Үшіншіден, "Қазақстан халқына" қоры да білім беру гранттарын ұсынады. Қосымша ақпаратты олардың сайтынан табуға болады",-деп жазды Асхат Аймағамбетов өзінің Telegram-арнасында.

Сонымен қатар, "бас тартылған" гранттардың да болатынын еске салды. Айтуынша кейбір талапкерлер алған гранттарынан бас тартады. Және мұндай жағдайлар көптеп кездеседі екен.

"Бесіншіден, сіз ақылы оқытуды таңдай аласыз: университетке коммерциялық негізде түсу, содан кейін табысты оқу және жоғары GPA арқылы бос гранттарға өтініш беруге болады. Алтыншыдан, "gap year" алуға мүмкіндік бар. Сіз бір жылға дайындалып, ҰБТ-ны қайтадан тапсырып, грант ала аласыз. Мен өзім осындай тәжірибеге ие болдым. Енді болмаса, колледжге түсуді қарастырыңыз. Еңбек нарығында осындай білімі бар мамандардың үлкен тапшылығы бар", – деп кеңес берді депутат. 

Депутат сұрақтар туындаса жоғары оқу орындарының қабылдау комиссияларына жүгінуді ұсынды.