Ақтөбе қаласының тұрғыны емхананы сотқа беріп, 700 мың теңге өндіріп алды. Әйелдің күйеуімүгедек болған және көптен бері №2 емханаға көрініп жүрген. Былтыр сәуір айында ер адам қайтыс болған. Ал оның әйелі емхана мамандарын күйеуін уақытылы және сапалы көмек көрсетпегені үшін айыптаған. Емхананы және дәрігерді сотқа беріп, жалғыз асыраушысынан айырылуына байланысты 1 миллион теңгенің моральдық шығынын өтеп беруді талап етіпті.

Сотта емхананың өкілі әйелдің талабымен келіспей, ер адамның өлімі мен емхана қызметкерлерінің әрекеті арасында ешқандай байланыс болмағанын мәлімдеді. Ал фармацевтикалық және медициналық бақылау департаментінің мамандары пациентті емдеу тәртібі бұзылғанын анықтады. Денсаулық сақтау министрлігінің бұйрығында көрсетілген талаптар да орындалмаған.

Судья анықталған заң бұзушылықтар пациент денсаулығының нашарлауына әсер етті, ал ең соңында оның қайтыс болуына әкелді дегеншешім қабылдады. Осылайша емханада сапасыз медициналық көмек көрсетілгені дәлелденді.

Сот шешімімен емхана жәбірленушіге 700 мың теңге көлемінде моральдық шығын төлеп беруге міндеттелді. Үкім заңды күшіне енген жоқ.

ҚазАқпарат