Үлкен қоқыстардың дұрыс шығарылмауы - Алматы үшін өзекті мәселелердің бірі. Шаһардың «Мәдени қала» атағы болса да, 2 миллионға жуық тұрғыны бар мегаполисте рұқсат етілмеген аймаққа жарамсыз диван, дөңгелек сынды үлкен қоқыстарды тастап кететін жағдайларды жиі көруге болады.

Күн сайын Алматыда 2 мың тоннадан астам қатты-тұрмыстық қоқыс жиналып, қала сыртындағы қоқыс сұрыптау зауытына шығарылады. Бірақ қатты тұрмыстық қалдықтармен бірге, ірі қоқыс алынбайды. Себебі Алматы қаласы мәслихатының шешімімен №505 бапқа сәйкес баспалдақ алаңдарында, кіреберістерде немесе контейнерлер маңындағы контейнерлік алаңдарда үлкен көлемді қоқыстарды жинауға тыйым салынады. 

Мұндай орындарға үлкен қоқысты тастап кету айыппұлға әкелуі мүмкін:

- Жеке тұлғалар үшін - 20 АЕК;

- Заңды тұлғалар үшін - 30 АЕК.

Қала әкімдігінің ресми мәліметіне сәйкес, алматылықтар үшін матрац, дөңгелек, ескі диван немесе қажетсіз тоңазытқыш сынды ірі қоқысты экологиялық таза түрде тапсыруға арналған екі мекен-жай қарастырылған. Олар:

- 7-ші көше, 134/12 (Алғабас ықшам ауданы);

- 144-ші есептік тоқсан, 4690 (Айтей ауылы, Қарасай ауданы, Алматы облысы).

Дереккөз kaz.inform.kz.