Қазақстанда өткен жылы дәрі-дәрмек және фармацевтикалық препараттар өндірісі 36,1 млрд теңгеге немесе 18,2%-ға қысқарды.

Егер 2021 жылдың қорытындысы бойынша фармацевтикалық компаниялар 198,7 млрд теңгенің өнімін шығарса, өткен жылы 162,6 млрд теңгенің өнімі өндірілді.

Бұған фармацевтикалық препараттар өндірісінің айтарлықтай төмендеуі әсер етті (құндық шамада минус 58,4%). Осы кезеңде дәрі-дәрмек шығару көрсеткіші де төмендеді, бірақ анау айтқандай көп емес: бар болғаны 4,5%. Фармацевтика саласында басқа өнімдердің өндірісі 61,1%-ға қысқарды, деп хабарлады Energyprom.kz.

Салада коронавируспен күресуге арналған фармацевтикалық өнімдерді үлкен көлемде өндіру тоқтатылды. Бұл ең алдымен "Спутник V" вакцинасына қатысты. Оны Қарағанды ​​фармацевтикалық кешені шығарды. Дәл осы ірі мемлекеттік тапсырыс Қарағанды ​​облысын 2021 жылы дәрілік заттар өндірісі бойынша үздік үштікке енгізді. Сол кезде облыста өндірілген өнімнің жалпы көлемі 47,6 млрд теңгеге жетті.

2022 жылы вакцина шығару аяқталғаннан кейін бұл көрсеткіш 2,5 есеге, яғни 19,1 млрд теңгеге дейін төмендеді. Нәтижесінде облыс фармацевтикалық өнім шығаратын өңірлер тізімінде төртінші орынға жылжыды.

Үздік үштік 2022 жылды жақсы қарқынмен аяқтады. Шымкентте 57,6 млрд теңгеге (плюс 13%), Алматы облысының фармацевтикалық кәсіпорындарында 39,5 млрд теңгеге (плюс 39,2%), Алматыда 21,7 млрд теңгеге (плюс 16,2%) дәрі-дәрмек өндірілді.

Жалпы, қазақстандықтар өткен жылы дәрі-дәрмекке 527 миллиард теңге, 2021 жылы 482 миллиард теңге жұмсаған.

Дәріханалар желісін дәрі-дәрмекпен қамтамасыз етушілердің алғашқы ондығына екі қазақстандық фармацевтикалық зауыт – шымкенттік Santo мен алматылық Nobel енді. Біріншісі бір жыл ішінде 28,7 млрд теңгенің өнімін өткізіп, сауда-саттық лидері атанды. Ал Nobel 16,4 млрд теңге көрсеткішпен алтыншы орында тұр.

Қазақпарат