Индонезияда шетелдік туристер үшін келу бойынша берілетін виза (Visa on Arrival, VOA) тарифін өзгерту жоспарланып отыр. Тарифті қазіргі 500 мың индонезиялық рупиядан (шамамен 13 мың теңге) ресімдеу әдісіне байланысты 750 мың немесе 1 миллион рупияға (шамамен 19,5 - 26 мың теңге) дейін көтеру ұсынылды, деп хабарлайды Tengri Travel Antaranews сайтына сілтеме жасап.
Виза құны қанша болады?
Қазіргі уақытта Visa on Arrival шетелдіктер үшін 500 мың рупия (шамамен 13 мың теңге) тұрады. Индонезия иммиграциялық қызметінің бас директоры Хендарасам Марантоко тарифті қайта қарау жоспары рупия бағамының құбылуына да байланысты екенін мәлімдеді.
"Біздің Visa on Arrival небәрі 500 мың рупия (шамамен 13 мың теңге) тұрады. Бағамның құбылуын ескерсек, бұл өте аз сома деп санаймыз. Сондықтан бізге тиісті өзгерістер енгізу қажет", - деді Хендарасам Джакартада өткен баспасөз брифингінде.
Жаңа тарифті 750 мыңнан 1 миллион рупияға дейінгі аралықта белгілеу жоспарланған - бұл шамамен 19,5–26 мың теңге.
Бұл ретте құны туристің визаны нақты қашан ресімдейтініне байланысты болады:
- 750 мың рупия - егер электронды виза алдын ала ресімделсе;
- 1 миллион рупия - егер виза Индонезияға келген бойда алынса.
Тариф не үшін өзгертіледі?
Иммиграциялық қызметтегілер бұл жерде мәселе тек бюджеттің қосымша кірісінде ғана емес екенін түсіндірді.
Әуежайда виза ресімдеу құнының жоғары болуы саяхатшыларды электронды рұқсатты алдын ала алуға ынталандыруы тиіс. Бұл, өз кезегінде, ұшып келгеннен кейін визаға бір мезетте жүгінетін адамдар санын азайтуға мүмкіндік береді.
Хендарасамның айтуынша, бұл әсіресе ірі әуежайлар, соның ішінде Сукарно-Хатта халықаралық әуежайы үшін өте маңызды.
Егер турист визаны алдын ала ресімдемесе, ұшып келгеннен кейін оған көбірек төлеу ұсынылады.
"Егер олар талаптарды сақтамаса немесе келгенге дейін виза ресімдемесе, олар 1 миллион төлейді - бұл сәл қымбатырақ", - деді иммиграциялық қызмет басшысы.
Ол басты мақсат тек мемлекеттік түсімдерді арттыру емес екенін атап өтті. Олардың пікірінше, визаларды алдын ала ресімдеу иммиграциялық қызметтерге түсетін жүктемені тиімдірек бөлуге және кезектерді азайтуға мүмкіндік береді.
Өзгерістердің қажеттілігі иммиграциялық қызметтің жұмыс көлемінің артуымен де түсіндіріледі. 2026 жылдың қаңтар-шілде айларында Индонезияда 4 879 160 электронды виза ресімделген.
Осы кезеңде келу бойынша 4 323 319 электронды виза (e-VOA) берілді. Сонымен қатар 53 347 шектеулі болу рұқсаты (Itas), 440 807 қонақ визасы (ITK), 131 алтын виза, визасыз режим аясында 61 687 рұқсат және 53 Global Citizen of Indonesia рұқсаты ресімделді.
Сонымен қатар болуға рұқсат алушылар саны да айтарлықтай өскен.
2026 жылдың алғашқы жеті айында Индонезияда 5 082 786 уақытша болу рұқсаты (ITK) берілді - бұл өткен жылдың сәйкес кезеңімен салыстырғанда 24,7 пайызға артық. Ол кезде мұндай рұқсаттардың 4 075 486-сы ресімделген болатын.
Шектеулі болу рұқсаттарының (ITAS) саны 26,4 пайызға - 115 252-ден 145 761-ге дейін өсті.
Қаңтар-шілде айларында 4 120 тұрақты болу рұқсаты (ITAP) берілді, бұл өткен жылғы 2 830 көрсеткішінен 45,5 пайызға жоғары.
https://kaz.tengrinews.kz/tengritravel/
