Бұл мәселені экономика министрі Серік Жұманғарин Қытайдың жетекші өнеркәсіптік және агроөнеркәсіптік холдингтерінің басшыларымен талқылады
Қытайлық компания Қазақстанда инвестиция көлемі 1,5 млрд долларға дейінгі ауқымды көмір-химия кешенін іске асыру мүмкіндігін қарастырып жатыр, деп хабарлайды Ұлттық экономика министрлігі.
"Жоба қосылған құны жоғары өнімдер шығаратын көмірді терең өңдеудің толық циклді кәсіпорнын құруды көздейді. China Pingmei Shenma Holding Group өкілдері Қазақстанда заманауи, интеграцияланған, толық циклді көмір-химия кешенін құру ниетін мәлімдеді және республиканы топтың Орталық Азиядағы негізгі инвестициялық орталығы ретінде қарастырады", — делінген хабарламада.
Ұлттық экономика министрі Серік Жұманғарин бұл мәселені QazTrade ("Сауда саясатын дамыту орталығы" АҚ) Үрімшідегі кеңсесінде Қытайдың жетекші өнеркәсіптік және агроөнеркәсіптік холдингтерінің басшыларымен талқылады.
Серік Жұманғарин бұл бастаманы қолдап, Қытай тарапын жобаны жүзеге асыру үшін жақын арада Қазақстанға келуге шақырды.
"Біз көмір-химия секторындағы жобаларды белсенді түрде қолдаймыз. Біз "Бәйтерек" холдингімен және Қазақстанның Даму банкімен бірлесіп жобалық қолдау көрсетуге және қаржыландыру тетіктерін әзірлеуге дайынбыз. Абай өңірі де ынтымақтастыққа ашық және жобаны жүзеге асыру үшін алаңдарды ұсынуға дайын", - деді ол.
Келіссөздердің қорытындысы бойынша China Pingmei Shenma Holding Group және "QazTrade сауда саясатын дамыту орталығы" Қазақстандағы көмір ресурстары мен көмір-химия өнеркәсібін дамыту бойынша стратегиялық ынтымақтастық туралы меморандумға қол қойды.
Дерек көзі: https://sputnik.kz