"Қазгидромет" синоптиктері Қазақстандағы 2026 жылдың қазан айына арналған консультативтік ауа райы болжамын нақтылады
Күздің екінші айы күрт суытудан, жаңбыр мен қардан басталады, алайда кейін елге қайта жылы күндер оралады. Оңтүстікте кей кездері ауа температурасы +30 градусқа дейін көтерілуі мүмкін. Бұл туралы "Сапалы Қазақстан" порталы Tengrinews.kz-ке сілтеме жасап хабарлайды.
Алдымен жаңбыр, қар және аяз
Қазан айының басында солтүстік циклонның келуіне байланысты Қазақстанда ауа райы күрт өзгереді. Елдің басым бөлігінде жаңбыр мен қар түрінде жауын-шашын күтіледі, жел күшейіп, екпіні секундына 15–28 метрге дейін жетеді. Елдің солтүстік жартысында жаяу бұрқасын болуы мүмкін.
Арктикалық ауа массаларының келуімен тұман, көктайғақ және үсік жүруі ықтимал.
Батыста және солтүстік-батыста түнде температура -6 градусқа дейін төмендеуі мүмкін, күндіз +2...+11 градус жылы болады. Солтүстікте, шығыста және орталықта түнде -6 градусқа дейін аяз, күндіз 0-ден +8 градусқа дейін жылылық күтіледі.
Оңтүстікте және оңтүстік-шығыста ауа райы жылырақ болады: түнде 0-ден +5-ке дейін, күндіз +10-нан +15 градусқа дейін. Таулы аймақтарда түнде температура -10 градусқа дейін төмендеуі мүмкін.
Кейін қайта жылынады
Қазанның бірінші онкүндігінің екінші жартысында Қазақстанға Орта Азия мен Жерорта теңізінің шығыс жағалауынан жылы ауа массалары келе бастайды. Елдің басым бөлігінде күндізгі температура +15...+20 градусқа дейін, ал оңтүстік-батыс пен оңтүстік жартысында +18...+28 градусқа дейін көтеріледі.
Бұл ретте қазанның екінші және үшінші онкүндіктерінде температура құбылмалы болады.
Оңтүстікте кей кезеңдерде күндіз ауа +30 градусқа дейін жылынуы мүмкін, ал түнде температура -6 градусқа дейін төмендеуі ықтимал.
Солтүстікте, шығыста және орталықта күндізгі температура әртүрлі кезеңдерде +15...+23-тен +3...+13 градусқа дейін өзгереді.
pixabay.com
Қазан айы нормадан жылы болады
Жалпы алғанда, қазан айындағы орташа температура Қазақстан аумағының басым бөлігінде климаттық нормадан 1–2 градусқа жоғары болады деп күтіледі.
Шығыс Қазақстан облысында, Павлодар облысының солтүстік-шығыс бөлігінде және Абай облысында температура норма шамасында болады деп болжанады.
Өңірлердің басым бөлігінде жауын-шашын мөлшері климаттық норма шегінде болады деп күтіледі.
Синоптиктер бір айға арналған болжам консультативтік сипатта екенін және алдағы уақытта синоптикалық жағдайдың өзгеруіне қарай түзетілуі мүмкін екенін атап өтті.
